Foto: riataza.com

Uaşington Tehrannan (Tegerannan) Bağdattağı elşilik pen Basradağı konsuldıqqa qarsı şabuıl jasauşı iraktıq narazılıq bildiruşilerge qoldau körsetpeuin talap etti. Iraktağı amerikalıq diplomattarğa jasalğan kez kelgen şabuılğa  Tehran jauaptı, - dep mälimdedi Aq üy.

Amerika äkimşiliginiñ mälimdeuinşe, Iran biligi iraktıq narazılıqqa şığuşılardı «qoldağanı üşin» qajetti jazasın alatın boladı. Äri, Tehran osı mäselege qatıstı «qol qusırıp otırğanı» üşin ğana emes, iraktıq narazılıqqa şığuşılardı qarjılandırğanı üşin de kinäli.

«Birikken Ştattar AQŞ-tıñ azamatın nemese qanday da bir nısanın ziyanğa wşıratatın kez kelgen şabuıl üşin Tehrandı jauapkerşilikke tartadı», - dep habarladı Aq üy.

Eske salayıq, Basradağı qarsılıq nauqandarı üstimizdegi jıldıñ şilde ayınan beri jalğasuda. Narazılıqqa şığuşı iraktıqtar 3 qırküyekte tağı da bas köterip, köptegen ğimarattardı qorşauğa alıp qana qoymay, keybirin örtegen edi. Şabuıl AQŞ konsul'dığına ğana emes, Iran konsul'dığına da jasalğan.

Bwl qarsılıq akciyaları elektrenergiyası men auız sudıñ üziluine baylanıstı bastalğan bolatın. Qarsılıqqa şığuşılardıñ şilde ayındağı şabuıldarı Bağdattıñ 17 mln. $ bölu arqılı osı keleñsizdikti joyıp, iraktıqtar üşin ondağan mıñ jwmıs orındarın qwryuğa bergen uädesinen keyin basılğan edi.

Qırküyek ayınıñ basınan beri Basrada orın alğan qarsılıq akciyalarınıñ saldarınan 15 adam qaza tauıp, 249 adam zardap şekken.

“The Qazaq Times”