Foto: eadaily.com

Soñğı uaqıttarı «Taliban» qozğalısınıñ  ükimetten iri qalalardı tartıp alumen äri körşi memleketter basşılarımen el tağdırına qatıstı öz betterinşe şeşimder şığaru siyaqtı äreketterimen Auğan biliginiñ şamına tiip jürgeni anıq. Sonday-aq, osınday äreketteri arqılı kün ötken sayın olardıñ belsendilikteri artıp, «jetistikterge» jetip jatqanı da bayqaladı.

"Jetistik" deytinimiz, keşe, 12 tamızda Auğanstannıñ iri qalasındağı bir qaqtığıs kezinde tälibter tarapınan 100 birdey kommandos öltirilgen. Bwl — osığan deyingi ekijaqtı qaqtığıstardıñ işindegi eñ qorqınıştı äri arnayı operaciya ökilderin öltiru isi boyınşa rekordtı körsetkiş bolıp sanaladı eken. Öltirilgen komandostardıñ amerikalıqtardıñ tikeley basşılıq etuimen jattığuşı arnayı bölimşelerdiñ küreskerleri ekeni anıqtalğan. Al, arnayı bölimşe küşteri men kommandostar auğan äskeriniñ betke wstarları bolıp esepteledi. Olar jaqsı jabdıqtalıp, qarulandırılğan äri amerikalıq nwsqauşılardıñ jetekşiligimen jattığıp twradı. Qalalar men qanday da bir aumaqtı tälibterden azat etuge bağıttalğan qwtqaru operaciyalarında aldıñğı şepte däl osı kommandostar orın aladı. Biraq, osınday äleuetke ie bir emes, jüz birdey kommandostıñ öltirilui tälibterdiñ basım küşke ie bola bastağandarın bildire me?

Keşe ğana tälibterdiñ «Jihad dauısı» («VICE OF JIHAD») saytında Auğanstannıñ Gazni qalasınıñ tälibterdiñ qolına ötkeni turalı habar taradı. «Äkimşilik ortalığı, policeydiñ ştab-päteri jäne Gaznidiñ özge de infraqwrılımdarı alındı» , - dep jazılğan saytta. Sonımen qatar, sayttağı osı habarda komandir men 5 oficermen qosa, ükimettik küştiñ 100 kommandosınıñ öltirilgeni turalı da habarlanğan. Al, bölimşeniñ qalğan otryadtarı tauğa qaşqan. Bwlardıñ bäri tälibterdiñ saytında jariyalanğandıqtan, senimdi derek bolıp ta sanalmas edi. Alayda, franciyalıq «20minutes.fr» saytı amerikalıq «The New York Times» basılımınıñ osı jañalıqtı rastağanına silteme jasap:

«Birneşe kün qatarınan kommandostar turalı eşqanday habar bolmadı. Jeksenbi küni olardıñ deneleri tabılğanda, arnayı bölimşe otryadı qwrbandarınıñ sanı 40 tan 100 adamğa deyin jetkeni turalı naqtılandı. Qwtqaruşılar 22 küreskerdi taudan tauıp alğannan keyin, olar esekpen qauipsiz jerge jetkizilgen», - dep habarlaydı.

Bügin, soñğı mälimetter boyınşa, tälibter qazirgi uaqıtta Kabul-Kandagar tas jolın jauıp tastap, Adjristan qalasın qorşauğa alıp otır. Batıstıq mamandar, tälibterdiñ birneşe nısanğa bir mezette şabuılday alatın taktikalardı äbden meñgergenin aytıp, äri arnayı bölimşe otryadtarınıñ qazirgi küşiniñ aytarlıqtay älsiregeni turalı da birdey pikirde. Bwl pikirlerin däleldeu üşin tälibterdiñ osı jıldıñ naurız ayında da Frah qalasına şabuıl jasap, 10 kommandos pen 8 policey ökiliniñ közin joyğandarın alğa tartadı.  Al, bwl jolı 10 emes 100 kommandostıñ öltirilui köpjıldıq soğısta tälibterdiñ jeñiske jetip jatqandığınıñ körinisi me?

“The Qazaq Times”