سوڭعى ۋاقىتتارى «تاليبان» قوزعالىسىنىڭ  ۇكىمەتتەن ءىرى قالالاردى تارتىپ الۋمەن ءارى كورشى مەملەكەتتەر باسشىلارىمەن ەل تاعدىرىنا قاتىستى ءوز بەتتەرىنشە شەشىمدەر شىعارۋ سياقتى ارەكەتتەرىمەن اۋعان بيلىگىنىڭ شامىنا ءتيىپ جۇرگەنى انىق. سونداي-اق، وسىنداي ارەكەتتەرى ارقىلى كۇن وتكەن سايىن ولاردىڭ بەلسەندىلىكتەرى ارتىپ، «جەتىستىكتەرگە» جەتىپ جاتقانى دا بايقالادى.

"جەتىستىك" دەيتىنىمىز، كەشە، 12 تامىزدا اۋعانستاننىڭ ءىرى قالاسىنداعى ءبىر قاقتىعىس كەزىندە تالىبتەر تاراپىنان 100 بىردەي كومماندوس ولتىرىلگەن. بۇل — وسىعان دەيىنگى ەكىجاقتى قاقتىعىستاردىڭ ىشىندەگى ەڭ قورقىنىشتى ءارى ارنايى وپەراتسيا وكىلدەرىن ءولتىرۋ ءىسى بويىنشا رەكوردتى كورسەتكىش بولىپ سانالادى ەكەن. ولتىرىلگەن كوماندوستاردىڭ امەريكالىقتاردىڭ تىكەلەي باسشىلىق ەتۋىمەن جاتتىعۋشى ارنايى بولىمشەلەردىڭ كۇرەسكەرلەرى ەكەنى انىقتالعان. ال، ارنايى بولىمشە كۇشتەرى مەن كومماندوستار اۋعان اسكەرىنىڭ بەتكە ۇستارلارى بولىپ ەسەپتەلەدى. ولار جاقسى جابدىقتالىپ، قارۋلاندىرىلعان ءارى امەريكالىق نۇسقاۋشىلاردىڭ جەتەكشىلىگىمەن جاتتىعىپ تۇرادى. قالالار مەن قانداي دا ءبىر اۋماقتى تالىبتەردەن ازات ەتۋگە باعىتتالعان قۇتقارۋ وپەراتسيالارىندا الدىڭعى شەپتە ءدال وسى كومماندوستار ورىن الادى. بىراق، وسىنداي الەۋەتكە يە ءبىر ەمەس، ءجۇز بىردەي كومماندوستىڭ ءولتىرىلۋى تالىبتەردىڭ باسىم كۇشكە يە بولا باستاعاندارىن بىلدىرە مە؟

كەشە عانا تالىبتەردىڭ «جيھاد داۋىسى» («VICE OF JIHAD») سايتىندا اۋعانستاننىڭ گازني قالاسىنىڭ تالىبتەردىڭ قولىنا وتكەنى تۋرالى حابار تارادى. «اكىمشىلىك ورتالىعى، پوليتسەيدىڭ شتاب-پاتەرى جانە گازنيدىڭ وزگە دە ينفراقۇرىلىمدارى الىندى» ، - دەپ جازىلعان سايتتا. سونىمەن قاتار، سايتتاعى وسى حاباردا كوماندير مەن 5 وفيتسەرمەن قوسا، ۇكىمەتتىك كۇشتىڭ 100 كومماندوسىنىڭ ولتىرىلگەنى تۋرالى دا حابارلانعان. ال، بولىمشەنىڭ قالعان وتريادتارى تاۋعا قاشقان. بۇلاردىڭ ءبارى تالىبتەردىڭ سايتىندا جاريالانعاندىقتان، سەنىمدى دەرەك بولىپ تا سانالماس ەدى. الايدا، فرانتسيالىق «20minutes.fr» سايتى امەريكالىق «The New York Times» باسىلىمىنىڭ وسى جاڭالىقتى راستاعانىنا سىلتەمە جاساپ:

«بىرنەشە كۇن قاتارىنان كومماندوستار تۋرالى ەشقانداي حابار بولمادى. جەكسەنبى كۇنى ولاردىڭ دەنەلەرى تابىلعاندا، ارنايى بولىمشە وتريادى قۇرباندارىنىڭ سانى 40 تان 100 ادامعا دەيىن جەتكەنى تۋرالى ناقتىلاندى. قۇتقارۋشىلار 22 كۇرەسكەردى تاۋدان تاۋىپ العاننان كەيىن، ولار ەسەكپەن قاۋىپسىز جەرگە جەتكىزىلگەن»، - دەپ حابارلايدى.

بۇگىن، سوڭعى مالىمەتتەر بويىنشا، تالىبتەر قازىرگى ۋاقىتتا كابۋل-كانداگار تاس جولىن جاۋىپ تاستاپ، ادجريستان قالاسىن قورشاۋعا الىپ وتىر. باتىستىق ماماندار، تالىبتەردىڭ بىرنەشە نىسانعا ءبىر مەزەتتە شابۋىلداي الاتىن تاكتيكالاردى ابدەن مەڭگەرگەنىن ايتىپ، ءارى ارنايى بولىمشە وتريادتارىنىڭ قازىرگى كۇشىنىڭ ايتارلىقتاي السىرەگەنى تۋرالى دا بىردەي پىكىردە. بۇل پىكىرلەرىن دالەلدەۋ ءۇشىن تالىبتەردىڭ وسى جىلدىڭ ناۋرىز ايىندا دا فراح قالاسىنا شابۋىل جاساپ، 10 كومماندوس پەن 8 پوليتسەي وكىلىنىڭ كوزىن جويعاندارىن العا تارتادى.  ال، بۇل جولى 10 ەمەس 100 كومماندوستىڭ ءولتىرىلۋى كوپجىلدىق سوعىستا تالىبتەردىڭ جەڭىسكە جەتىپ جاتقاندىعىنىڭ كورىنىسى مە؟

“The Qazaq Times”