Foto: Almatı oblısı äkimdiginen

Almatı oblısı delegaciyasınıñ eki jaqtı baylanıstardı nığaytuğa bağıttalğan Tatarstanğa saparı jalğasuda. Osı saparı barısında Qazan qalasındağı «Qazan» agroönerkäsiptik parkine jetisulıqtar qızığuşılıq tanıttı, - dep habarlaydı Almatı oblısı äkiminiñ baspasöz qızmeti.

Nısan işinde ekskursiya jasap körsetken Agroönerkäsiptik parktiñ bas direktorı Oleg Vlasovtıñ aytuınşa, jalpı aumağı 50 mıñ şarşı metr. Parktiñ eñ bastı erekşeligi – ol bir merzimde birneşe funkciyanı, atap aytqanda, qoymağa jinaqtau, öñdeu, dayın önimdi satu siyaqtı isterdi qatar atqara aladı. Bwl rette käsipkerlerge qolaylılıq üşin  barlıq infraqwrılımdar jasalğan. Oblıs äkimi Amandıq Batalov bastağan delegaciya parktiñ öndiristik jäne qaptau cehtarında, jabıq bazarında bolıp, Tatarstanda öndirilgen önimderdiñ köptegen türlerimen tanıstı.

Sonday-aq öndiristik-önerkäsiptik tiptegi «Alabwğa» erekşe ekonomikalıq aymağında jäne «KAMAZ» JAQ-da boldı.

Büginde «Alabwğa» aymağı öndiristik qalaşıqqa aynalğan. Mwndağı 4 gektar aumaqta 56 öndiristik jäne logistikalıq käsiporındar tirkelgen. Olardıñ 24-i qazirdiñ özinde tolıqqandı jwmıs istep, mañayındağı eldi mekenderdiñ 6 jarım mıñğa juıq adamın eñbekpen qamtıp otır. Salıstırmalı türde aytqanda 74 mıñ twrğını bar şağın Elabwğa eldi mekenine erekşe ekonomikalıq aymaq özi jwmıs istegen 12 jıl işinde 114 mlrd. som investiciya tartıp ülgergen. Mwnday qomaqtı qarjı eldiñ äl-auqatın köterumen qatar tarihi qwndı eskertkişterin saqtau men olardı kütip-baptauğa mümkindik berip otır. Mwnday eskertkişterdiñ qatarında Marina Cvetaevanıñ, Ivan Şukşinnıñ jäne basqa da mädeniet, öner qayratkerleriniñ muzey üyleri bar.

- Biz, Almatı oblısı Qazaqstandağı eñ iri auıl şaruaşılığı tauarların öndiruşiniñ biri retinde mwndağı auıl şaruaşılığı salasınıñ tıñ jobalarına qızığuşılıq tanıtıp otırmız. «Qazan» agroparki jwmısınıñ tiimdi wyımdastırıluı öte wnadı. Onda üsteme bağasız öz önimderin tikeley twtınuşığa jetkizu mümkindikteri qolaylı qarastırılğan eken. Sol siyaqtı öndiristik alañdardı damıtudağı täjiribeleriñiz de biz üşin mañızdı, - dedi A. Batalov Qazan Kremliniñ Gubernatorlıq sarayında ötken Tatarstan Prezidenti Rustam Minnihanovpen kezdesuinde.

Öz kezeginde R. Minnihanov Qazaqstan aumağında bineşe iri jobalar jüzege asıp jatqanın, sonıñ işinde «Qorğas – Şığıs qaqpası» AEA-nıñ mañızı erekşe ekenine toqtaldı:

- «Qorğas» jobası ülken qızığuşılıq tuğızatın jäne zor äleueti bar joba. Onı älemdik deñgeydegi iri kölik-logitikalıq hab retinde kördik. Biz öz tarapımızdan osı bağıtta äriptestik baylanıs ornatuğa, biznes-baylanıstarımızdıñ auqımın keñeytuge dayınbız, - dedi ol.

  “The Qazaq Times”