الماتى وبلىسى اۋىلشارۋاشىلىعى مەن ونەركاسىپتە تاجىريبە الماسۋعا مۇددەلىلىك تانىتتى

الماتى وبلىسى دەلەگاتسياسىنىڭ ەكى جاقتى بايلانىستاردى نىعايتۋعا باعىتتالعان تاتارستانعا ساپارى جالعاسۋدا. وسى ساپارى بارىسىندا قازان قالاسىنداعى «قازان» اگروونەركاسىپتىك پاركىنە جەتىسۋلىقتار قىزىعۋشىلىق تانىتتى، - دەپ حابارلايدى الماتى وبلىسى اكىمىنىڭ ءباسپاسوز قىزمەتى.

نىسان ىشىندە ەكسكۋرسيا جاساپ كورسەتكەن اگروونەركاسىپتىك پاركتىڭ باس ديرەكتورى ولەگ ۆلاسوۆتىڭ ايتۋىنشا، جالپى اۋماعى 50 مىڭ شارشى مەتر. پاركتىڭ ەڭ باستى ەرەكشەلىگى – ول ءبىر مەرزىمدە بىرنەشە فۋنكتسيانى، اتاپ ايتقاندا، قويماعا جيناقتاۋ، وڭدەۋ، دايىن ءونىمدى ساتۋ سياقتى ىستەردى قاتار اتقارا الادى. بۇل رەتتە كاسىپكەرلەرگە قولايلىلىق ءۇشىن  بارلىق ينفراقۇرىلىمدار جاسالعان. وبلىس اكىمى اماندىق باتالوۆ باستاعان دەلەگاتسيا پاركتىڭ وندىرىستىك جانە قاپتاۋ تسەحتارىندا، جابىق بازارىندا بولىپ، تاتارستاندا وندىرىلگەن ونىمدەردىڭ كوپتەگەن تۇرلەرىمەن تانىستى.

سونداي-اق وندىرىستىك-ونەركاسىپتىك تيپتەگى «الابۇعا» ەرەكشە ەكونوميكالىق ايماعىندا جانە «كاماز» جاق-دا بولدى.

بۇگىندە «الابۇعا» ايماعى وندىرىستىك قالاشىققا اينالعان. مۇنداعى 4 گەكتار اۋماقتا 56 وندىرىستىك جانە لوگيستيكالىق كاسىپورىندار تىركەلگەن. ولاردىڭ 24-ءى قازىردىڭ وزىندە تولىققاندى جۇمىس ىستەپ، ماڭايىنداعى ەلدى مەكەندەردىڭ 6 جارىم مىڭعا جۋىق ادامىن ەڭبەكپەن قامتىپ وتىر. سالىستىرمالى تۇردە ايتقاندا 74 مىڭ تۇرعىنى بار شاعىن ەلابۇعا ەلدى مەكەنىنە ەرەكشە ەكونوميكالىق ايماق ءوزى جۇمىس ىستەگەن 12 جىل ىشىندە 114 ملرد. سوم ينۆەستيتسيا تارتىپ ۇلگەرگەن. مۇنداي قوماقتى قارجى ەلدىڭ ءال-اۋقاتىن كوتەرۋمەن قاتار تاريحي قۇندى ەسكەرتكىشتەرىن ساقتاۋ مەن ولاردى كۇتىپ-باپتاۋعا مۇمكىندىك بەرىپ وتىر. مۇنداي ەسكەرتكىشتەردىڭ قاتارىندا مارينا تسۆەتاەۆانىڭ، يۆان شۋكشيننىڭ جانە باسقا دا مادەنيەت، ونەر قايراتكەرلەرىنىڭ مۋزەي ۇيلەرى بار.

- ءبىز، الماتى وبلىسى قازاقستانداعى ەڭ ءىرى اۋىل شارۋاشىلىعى تاۋارلارىن ءوندىرۋشىنىڭ ءبىرى رەتىندە مۇنداعى اۋىل شارۋاشىلىعى سالاسىنىڭ تىڭ جوبالارىنا قىزىعۋشىلىق تانىتىپ وتىرمىز. «قازان» اگروپاركى جۇمىسىنىڭ ءتيىمدى ۇيىمداستىرىلۋى وتە ۇنادى. وندا ۇستەمە باعاسىز ءوز ونىمدەرىن تىكەلەي تۇتىنۋشىعا جەتكىزۋ مۇمكىندىكتەرى قولايلى قاراستىرىلعان ەكەن. سول سياقتى وندىرىستىك الاڭداردى دامىتۋداعى تاجىريبەلەرىڭىز دە ءبىز ءۇشىن ماڭىزدى، - دەدى ا. باتالوۆ قازان كرەملىنىڭ گۋبەرناتورلىق سارايىندا وتكەن تاتارستان پرەزيدەنتى رۋستام ميننيحانوۆپەن كەزدەسۋىندە.

ءوز كەزەگىندە ر. ميننيحانوۆ قازاقستان اۋماعىندا بىنەشە ءىرى جوبالار جۇزەگە اسىپ جاتقانىن، سونىڭ ىشىندە «قورعاس – شىعىس قاقپاسى» اەا-نىڭ ماڭىزى ەرەكشە ەكەنىنە توقتالدى:

- «قورعاس» جوباسى ۇلكەن قىزىعۋشىلىق تۋعىزاتىن جانە زور الەۋەتى بار جوبا. ونى الەمدىك دەڭگەيدەگى ءىرى كولىك-لوگيتيكالىق حاب رەتىندە كوردىك. ءبىز ءوز تاراپىمىزدان وسى باعىتتا ارىپتەستىك بايلانىس ورناتۋعا، بيزنەس-بايلانىستارىمىزدىڭ اۋقىمىن كەڭەيتۋگە دايىنبىز، - دەدى ول.

  “The Qazaq Times”