Foto: Nikolas Maduro

Venesuela prezidenti Nikolas Maduro özine qastandıq jasauşı topqa 50 million dollar wsınılıp, olardıñ AQŞ-qa ketuine uäde berilgenin mälimdedi. Onıñ sözinşe, osı qastandıq äreketine Kolumbiyada wzaq uaqıt boyı dayındıq jürgizilgen, - dep habarlaydı Telesur.

Bwdan bölek, Maduro özine jasalğan osı şabuılğa tapsırıs beruşiniñ esimin de atağan. Venesuela prezidentiniñ aytuınşa, ol — Kolumbiyada twratın oppoziciya lideri Hulio Borhes. Sonımen qatar, onıñ sözinşe, qastandıqtı jasauşılar oyların jüzege asıru üşin birneşe kündi qarastırğan. Aldımen, ötken aydıñ 24 şildesinde ötken äskeri şeru kezine josparlanğan. Odan soñ, 5-şilde Venesuelanıñ täuelsizdik küninde iske asıruğa tırısqan. Aqırı, 5-tamızğa toqtalğan. Bwdan bwrın Maduro özine jasalğan qastandıqqa Kolumbiya ükimetiniñ qatısı bar dep mälimdegen edi. Prezident Maduro qoldarında Kolumbiyanıñ osı iske qatıstılığın rastaytın, äsirese Kolumbiya prezidentiniñ tağınan ketken Huana Manuel Santosqa da qatıstı dälelder bar ekenin aytqan bolatın.

Eske sala keteyik, 5 tamız küni Venesuelanıñ Bolivar wlttıq gvardiyasınıñ qwrılğanına 81 jıl toluına oray wyımdastırılğan saltanattı räsim kezinde el prezidentine qastandıq jasalğan edi. Venesuelanıñ Baylanıs ministri Horke Rodrigestiñ sözinşe, prezident tribunasına jarılğışı bar eki dron bağıttalğan. Oqiğa saldarınan jeti äskeri jaraqattanğan. Al, Maduronıñ özi aman qalğan.

Osı oqiğağa qatıstı isti «Flaneldi äsker» attı astırtın top öz moynına alıp otır. Degenmen, qazirgi tañda istiñ män-jayı jan-jaqtı tekserilude.

“The Qazaq Times”