فوتو: نيكولاس مادۋرو

ۆەنەسۋەلا پرەزيدەنتى نيكولاس مادۋرو وزىنە قاستاندىق جاساۋشى توپقا 50 ميلليون دوللار ۇسىنىلىپ، ولاردىڭ اقش-قا كەتۋىنە ۋادە بەرىلگەنىن مالىمدەدى. ونىڭ سوزىنشە، وسى قاستاندىق ارەكەتىنە كولۋمبيادا ۇزاق ۋاقىت بويى دايىندىق جۇرگىزىلگەن، - دەپ حابارلايدى Telesur.

بۇدان بولەك، مادۋرو وزىنە جاسالعان وسى شابۋىلعا تاپسىرىس بەرۋشىنىڭ ەسىمىن دە اتاعان. ۆەنەسۋەلا پرەزيدەنتىنىڭ ايتۋىنشا، ول — كولۋمبيادا تۇراتىن وپپوزيتسيا ليدەرى حۋليو بورحەس. سونىمەن قاتار، ونىڭ سوزىنشە، قاستاندىقتى جاساۋشىلار ويلارىن جۇزەگە اسىرۋ ءۇشىن بىرنەشە كۇندى قاراستىرعان. الدىمەن، وتكەن ايدىڭ 24 شىلدەسىندە وتكەن اسكەري شەرۋ كەزىنە جوسپارلانعان. ودان سوڭ، 5-شىلدە ۆەنەسۋەلانىڭ تاۋەلسىزدىك كۇنىندە ىسكە اسىرۋعا تىرىسقان. اقىرى، 5-تامىزعا توقتالعان. بۇدان بۇرىن مادۋرو وزىنە جاسالعان قاستاندىققا كولۋمبيا ۇكىمەتىنىڭ قاتىسى بار دەپ مالىمدەگەن ەدى. پرەزيدەنت مادۋرو قولدارىندا كولۋمبيانىڭ وسى ىسكە قاتىستىلىعىن راستايتىن، اسىرەسە كولۋمبيا پرەزيدەنتىنىڭ تاعىنان كەتكەن حۋانا مانۋەل سانتوسقا دا قاتىستى دالەلدەر بار ەكەنىن ايتقان بولاتىن.

ەسكە سالا كەتەيىك، 5 تامىز كۇنى ۆەنەسۋەلانىڭ بوليۆار ۇلتتىق گۆاردياسىنىڭ قۇرىلعانىنا 81 جىل تولۋىنا وراي ۇيىمداستىرىلعان سالتاناتتى ءراسىم كەزىندە ەل پرەزيدەنتىنە قاستاندىق جاسالعان ەدى. ۆەنەسۋەلانىڭ بايلانىس ءمينيسترى حوركە رودريگەستىڭ سوزىنشە، پرەزيدەنت تريبۋناسىنا جارىلعىشى بار ەكى درون باعىتتالعان. وقيعا سالدارىنان جەتى اسكەري جاراقاتتانعان. ال، مادۋرونىڭ ءوزى امان قالعان.

وسى وقيعاعا قاتىستى ءىستى «فلانەلدى اسكەر» اتتى استىرتىن توپ ءوز موينىنا الىپ وتىر. دەگەنمەن، قازىرگى تاڭدا ءىستىڭ ءمان-جايى جان-جاقتى تەكسەرىلۋدە.

“The Qazaq Times”