Foto: worldbulletin.net

AQŞ-tıñ Qarjı ministrligi keşe, 1 tamız küni Türkiya SİM jäne Ädilet ministrleriniñ aktivteri men esepşottarın bwğattap tastadı. Bwl jöninde Aq üydiñ baspasöz hatşısı Sara Sanders mälimdedi.

Bügin, osı şeşimge baylanıstı Türkiyanıñ Sırtqı ister ministrligi öz qarsılığın bildirdi. «AQŞ-tıñ agressivti äreketine jedel äri layıqtı türde jauap jasalatın boladı. AQŞ-tı osı qate şeşimnen bas tartuğa şaqıramız», - delingen, Türkiya SİM-niñ mälimdemesinde. AQŞ-tıñ Türkiya SİM ministri Süleymen Soylu men Ädilet ministri Äbdülhamid Gülge sankciya engizuine Türkiya biliginiñ amerikalıq pastor Endryu Bransonnıñ otanına oraluına rwqsat etpeui sebep bolğan. Onıñ üstine, Türkiya oğan qarsı 2016 jılğı töñkeris äreketine qatısı bar degen ayıppen sot isin jalğastıruda. Eger osı ministrlerdiñ AQŞ territoriyasında esepşottarı men aktivteri bar bolsa, tügel bwğattalmaq.  Sankciya 2016 jılı AQŞ kongresi tarapınan qabıldanğan Magnit dep atalatın jahandıq akti ayasında qabıldanğan. Bwl akt Uaşingtonnıñ pikiri boyınşa,  adam qwqığın bwzu men jemqorlıqqa qatısı bar twlğalarğa qarsı bağıttalğan.

Eske salayıq, Türkiyanıñ Izmir qalasında twratın protestanttıq pastor 2016 jıldıñ soñında Türkiyada tıyım salınğan Kürd Jwmısşılar partiyası men «FETO» wyımına qatısı bar degen küdikpen qamauğa alınğan edi. Qazirgi uaqıtta üyqamaqqa alınğan E.Bransonğa 35 jılğa deyingi bas bostandığınan ayırılu jazası berilui mümkin.

Osığan deyin de saytımızda jazğanımızday, AQŞ prezidenti Donal'd Tramp şilde ayınıñ soñında pastordıñ twtqındalğanı üşin Türkiyağa sankciya engizui mümkin ekenin eskertken edi. "Pastor Endryu Bransondı bosatıñızdar nemese bizdiñ qanday şeşimge baratınımızdı küte beriñizder",   - dep jazğan edi AQŞ prezidenti öziniñ "Tvitter" paraqşasında.

“The Qazaq Times”