اقش تۇركيا مينيسترلەرىنە سانكتسيا سالدى

اقش-تىڭ قارجى مينيسترلىگى كەشە، 1 تامىز كۇنى تۇركيا ءسىم جانە ادىلەت مينيسترلەرىنىڭ اكتيۆتەرى مەن ەسەپشوتتارىن بۇعاتتاپ تاستادى. بۇل جونىندە اق ءۇيدىڭ ءباسپاسوز حاتشىسى سارا ساندەرس مالىمدەدى.

بۇگىن، وسى شەشىمگە بايلانىستى تۇركيانىڭ سىرتقى ىستەر مينيسترلىگى ءوز قارسىلىعىن ءبىلدىردى. «اقش-تىڭ اگرەسسيۆتى ارەكەتىنە جەدەل ءارى لايىقتى تۇردە جاۋاپ جاسالاتىن بولادى. اقش-تى وسى قاتە شەشىمنەن باس تارتۋعا شاقىرامىز»، - دەلىنگەن، تۇركيا ءسىم-ءنىڭ مالىمدەمەسىندە. اقش-تىڭ تۇركيا ءسىم ءمينيسترى سۇلەيمەن سويلۋ مەن ادىلەت ءمينيسترى ءابدۇلحاميد گۇلگە سانكتسيا ەنگىزۋىنە تۇركيا بيلىگىنىڭ امەريكالىق پاستور ەندريۋ برانسوننىڭ وتانىنا ورالۋىنا رۇقسات ەتپەۋى سەبەپ بولعان. ونىڭ ۇستىنە، تۇركيا وعان قارسى 2016 جىلعى توڭكەرىس ارەكەتىنە قاتىسى بار دەگەن ايىپپەن سوت ءىسىن جالعاستىرۋدا. ەگەر وسى مينيسترلەردىڭ اقش تەرريتورياسىندا ەسەپشوتتارى مەن اكتيۆتەرى بار بولسا، تۇگەل بۇعاتتالماق.  سانكتسيا 2016 جىلى اقش كونگرەسى تاراپىنان قابىلدانعان ماگنيت دەپ اتالاتىن جاھاندىق اكتى اياسىندا قابىلدانعان. بۇل اكت ۋاشينگتوننىڭ پىكىرى بويىنشا،  ادام قۇقىعىن بۇزۋ مەن جەمقورلىققا قاتىسى بار تۇلعالارعا قارسى باعىتتالعان.

ەسكە سالايىق، تۇركيانىڭ يزمير قالاسىندا تۇراتىن پروتەستانتتىق پاستور 2016 جىلدىڭ سوڭىندا تۇركيادا تىيىم سالىنعان كۇرد جۇمىسشىلار پارتياسى مەن «فەتو» ۇيىمىنا قاتىسى بار دەگەن كۇدىكپەن قاماۋعا الىنعان ەدى. قازىرگى ۋاقىتتا ۇيقاماققا الىنعان ە.برانسونعا 35 جىلعا دەيىنگى باس بوستاندىعىنان ايىرىلۋ جازاسى بەرىلۋى مۇمكىن.

وسىعان دەيىن دە سايتىمىزدا جازعانىمىزداي، اقش پرەزيدەنتى دونالد ترامپ شىلدە ايىنىڭ سوڭىندا پاستوردىڭ تۇتقىندالعانى ءۇشىن تۇركياعا سانكتسيا ەنگىزۋى مۇمكىن ەكەنىن ەسكەرتكەن ەدى. "پاستور ەندريۋ برانسوندى بوساتىڭىزدار نەمەسە ءبىزدىڭ قانداي شەشىمگە باراتىنىمىزدى كۇتە بەرىڭىزدەر",   - دەپ جازعان ەدى اقش پرەزيدەنتى ءوزىنىڭ "تۆيتتەر" پاراقشاسىندا.

“The Qazaq Times”