AQŞ Memlekettik departamentiniñ jetekşisi Entoni Blinken Reseydiñ Amerika Qwrama Ştattarına qarsı qastandıq äreketteri tekserilip jatqanın, bwl küdik rastalsa «auır jauabı» bar ekenin ayttı. Memlekettik hatşı bwl pikirin CNN arnasına bergen swhbatında ortağa salğan.

Blinken sözi Reseydiñ Qwrama Ştatqa qarsı ziyandı is-qimıldarı turalı barlau qızmetiniñ tergeu jwmıstarın meñzeydi. Qazir AQŞ Ortalıq barlau agenttigi osı turasında qorıtındı mälimdeme dayındap otır. Jaqında AQŞ Kongress müşeleri aldında bayandama jasalmaq. Blinken sözinde eger atalğan qorıtındı da Reseydiñ «qastandığı» rastalsa «AQŞ müddesin qorğau üşin tiisti şaralar jasalatının» aytqan.

AQŞ mem. hatşısınıñ sözinşe, Qwrama Ştattardıñ batıstıq odaqtastarına Reseyge qatıstı «sergek bolu» eskertilgen eken, soğan qosa Mäskeudi birlesip jauapqa tartu üşin «ortaq mindetteme» alğan.

Ol Reseyge naqtı qanday jauap qaytarılatının aşıq aytpağan. Tek, qarsı şaralar NATO-dağı odaqtastarımen aqıldasu üstinde ekenin bildirgen. AQŞ bas diplomatınıñ bwl sözine qarağanda Reseyge qarsı kezekti jauap asa auqımdı boluı mümkin. Bwğan tipti NATO-dağı odaqtastarı da tartıluı mümkin.

Bayden äkimşiliginiñ Putin biligine qatañ bolatını osığan deyin de, tipti ol qızmetke kirisuden bwrın aytılıp kelgen edi. Putin men Bayden yadrolıq qarudı baqılauğa alu kelisiminiñ merzimin wzartu turasında tez til tabıstı. Bwl keybir sarapşılardı Uaşington men Mäskeu arasında jılımıq boluı da mümkin dep boljauğa itermelegen. Biraq, bir ğana mäselede kelisimge kelip, Bayden Putinniñ ol qadamın alqağanımen basqa mäseleler jeterlik boldı. Äsirese, Auğanstandağı AQŞ äskerlerin öltirgen tälipterge sıyaqı töleu turalı ayıptau Kreml'ge oñay tigen joq. Osı sekildi ayıptarı däleldense aldağı uaqıtta Reseyge es jiya almaytın jaña sankciya salınuı mümkin dep boljauğa negiz bar.

Jalpı Reseyge tağılğan negizgi ayıptardıñ qatarı mınau: AQŞ-tağı saylauğa aralasu arqılı, demokratiyalıq jüyege qol swğu; AQŞ-tıñ Solar Wind tehnologiyalıq kompaniyasınıñ AQŞ ükimettik jelisine enu üşin hakerlik şabuıl josparlağan; Auğan jerindegi AQŞ äskerlerin öltirgenderge sıyaqı tölegen, t.b. Eger bwğan «Gavana sindromı» da Reseydiñ ayıbı qatarına jatqızılsa onıñ saldarı Resey üşin tipti de auır bola tüsedi.

Ärine, öz kezeginde Mäskeu bwl ayıptardı joqqa şığardı.

“The Qazaq Times”