Erdoğan men Tramp. Foto: trthaber.com.

Türkiya prezidenti Rejep Tayıp Erdoğan AQŞ tarabı bwrınğı qol qoyğan kelisim boyınşa Türkiya äue küşterine F-35 wşaqtarın satıp bermeytin bolsa, halıqaralıq sotqa şağım tüsiretinin aşıq ayttı. Anığında, türik eli men Qwrama Ştat arasındağı kelisim Türkiya-Resey arasındağı S-400 saudasına baylanıstı bwzılğan bolatın.

Daudıñ bası Süriya soğısı 

Bwl qaru-jaraq saudasınıñ dauı Süriya soğısı kezinen bastau alğan. Süriya soğısı kezinde Türkiya äue qauipsizdigin qamtamasız ete almağan NATO-ğa ökpelep, öz äue keñistigin özi qorğauğa kirisken. 2013 jılı Qwrama Ştat öziniñ Patriot attı zımıran qorğanıs jüyesin berdi. Alayda, 2015 jılğa jetkende bwl qwraldarın Türkiyadan alıp kete bastadı. Onıñ sebebin Süriyanıñ äskeri quatınıñ älsireuinen dep tüsindirgen. Osı twstarda Türkiya şın mänisinde äue qorğanıs jüyesi joq elge aynalıp qaldı.

Türkiyanıñ jedel qadamı

Sonıñ nätijesinde Resey-Türkiya arasında S-400 äue qorğanıs jüyesin satu-satıp alu kelisimi jasaldı. Reseylik bwl qaru RF-nıñ özinen tıs Qıtay men Belarus' qatarlı elderde ğana bar. NATO-ğa müşe elder arasında Türkiyada ğana zımıran qorğanısına arnalğan reseylik qaru bar.

AQŞ pen NATO-nıñ narazılığı

Bwl jağday AQŞ-tıñ narazılığın tudırdı. Qwrama Ştat bastatqan NATO müşeleri wyımğa müşe elder territoriyasın qorğaytın ortaq jüyeni ğana paydalanudı alğa tartqan. Alayda, Ankara tarabı birtwtas jüyeniñ Türkiya territoriyasın qorğauğa därmensiz ekenin alğa tarttı.

Qwrama Ştat senatorları Erdoğanğa qayta-qayta eskertu jasap, Reseyge sankciya salınğanın esine salıp keldi. Osı jazda AQŞ Kongresi Türkiyanı rayınan qaytaru üşin jaña ülgidegi F-35 wşaqtarın bermeu turalı jobanı köterdi. Alayda, Tramp mausım ayında ğana äskeri wşaqtardı jetkizip beruge uäde etken. Sonda da, Kongress reseydik qorğanıs jüyesin satıp alğan elge äskeri wşaq ötkizip beru isin qayta qaraudı  wsındı.

F-35 wşaqtarı Türkiyağa ne üşin kerek boldı?

Şın mäninde, Türkiya öziniñ besinşi wrpaq äue küşterin jasaqtap şıqpaq. Bwl strategiyalıq joba TFX dep ataladı, ol üşin Türkiyanıñ öz öndiruşi, injenerlerinen sırt, britandıq BAE Systems da tartılğan. Al, F-35 wşağı bolsa qazir älemdegi eñ ozıq äskeri wşaq bolıp tabıladı. Ol AQŞ-ta 1990 jıldardan beri jasalıp keledi. Eger Qwrama Ştat tarabı atalğan wşağın Türkiyağa satıp bermese, türik tarabı Reseydiñ Su-57 wşağın satıp aluı mümkin delingen.

“The Qazaq Times”