Almatı oblıstıq mäslihatınıñ deputattarı Rayımbek audanın bölu is-şaralarına qosımşa qarjı qarastıru wsınısın qoldadı. Bwl turalı oblıstıq mäslihattıñ kezekten tıs XXXIV sessiyasında belgili boldı, - dep habarlaydı Almatı oblısı äkiminiñ baspasöz qızmeti.

Oblıs äkimi Amandıq Batalov qatısqan sessiya jwmısında oblıstıq mäslihattıñ «Almatı oblısınıñ 2018-2020 jıldarğa arnalğan oblıstıq byudjeti turalı» № 26-128 şeşimine özgerister engizu turalı mäsele qaraldı. Onda Rayımbek audanın ekige bölu arqılı jaña audan qalıptastıru jwmıstarına jergilikti byudjet esebinen 890 mln. teñge bölindi. Onıñ işinde twrğın üyler qwrılısı, mekemelerdi jöndeu, auız su jüyesi, jol jöndeu şaralarımen qatar kartop ösiru bağıtındağı 2 servistik-dayındau ortalığın qwruğa da qarjı qarastırılıp otır.

Sonday-aq Alaköl köliniñ turistik äleuetin arttıruğa 744,8 mln. teñge bölinbek. Bwl qarjığa köl jağalauın nığaytu, Üşaral qalasındağı äuejaydıñ wşu-qonu jolağın qayta jañğırtu, Aqşi auılın abattandıru, auız su jäne käriz jüyeleri qwrılısınıñ qwjattamaların äzirleu şaraları atqarılmaq.

Sonımen qatar energetika jäne TÜKŞ, auıl şaruaşılığı, «Cifrlı Qazaqstan- 2020» bağdarlamasın jüzege asıru, tötenşe jağdaylardıñ aldın alu, joldardı jöndeu isine de qarjılay qoldau şaraları körsetilmek. Äleumettik sala da nazardan tıs qalmay, tegin däri-därmekpen qamtamasız etuge, bilim beru nısandarınıñ materialdıq-tehnikalıq bazasın nığaytuğa, mektepterdi keñ jolaqtı Internet jelisimen qamtuğa jäne basqa da mañızdı is-şaralarğa qarjı qarastırıldı.

Sessiya soñında birqatar azamattar oblıs äkimi qolınan «Astananıñ 20 jıldığı» merekelik medalin aldı.

“The Qazaq Times”