الماتى وبلىستىق ءماسليحاتىنىڭ دەپۋتاتتارى رايىمبەك اۋدانىن ءبولۋ ءىس-شارالارىنا قوسىمشا قارجى قاراستىرۋ ۇسىنىسىن قولدادى. بۇل تۋرالى وبلىستىق ءماسليحاتتىڭ كەزەكتەن تىس XXXIV سەسسياسىندا بەلگىلى بولدى، - دەپ حابارلايدى الماتى وبلىسى اكىمىنىڭ ءباسپاسوز قىزمەتى.

وبلىس اكىمى اماندىق باتالوۆ قاتىسقان سەسسيا جۇمىسىندا وبلىستىق ءماسليحاتتىڭ «الماتى وبلىسىنىڭ 2018-2020 جىلدارعا ارنالعان وبلىستىق بيۋدجەتى تۋرالى» № 26-128 شەشىمىنە وزگەرىستەر ەنگىزۋ تۋرالى ماسەلە قارالدى. وندا رايىمبەك اۋدانىن ەكىگە ءبولۋ ارقىلى جاڭا اۋدان قالىپتاستىرۋ جۇمىستارىنا جەرگىلىكتى بيۋدجەت ەسەبىنەن 890 ملن. تەڭگە ءبولىندى. ونىڭ ىشىندە تۇرعىن ۇيلەر قۇرىلىسى، مەكەمەلەردى جوندەۋ، اۋىز سۋ جۇيەسى، جول جوندەۋ شارالارىمەن قاتار كارتوپ ءوسىرۋ باعىتىنداعى 2 سەرۆيستىك-دايىنداۋ ورتالىعىن قۇرۋعا دا قارجى قاراستىرىلىپ وتىر.

سونداي-اق الاكول كولىنىڭ تۋريستىك الەۋەتىن ارتتىرۋعا 744,8 ملن. تەڭگە بولىنبەك. بۇل قارجىعا كول جاعالاۋىن نىعايتۋ، ءۇشارال قالاسىنداعى اۋەجايدىڭ ۇشۋ-قونۋ جولاعىن قايتا جاڭعىرتۋ، اقشي اۋىلىن اباتتاندىرۋ، اۋىز سۋ جانە كارىز جۇيەلەرى قۇرىلىسىنىڭ قۇجاتتامالارىن ازىرلەۋ شارالارى اتقارىلماق.

سونىمەن قاتار ەنەرگەتيكا جانە تۇكش، اۋىل شارۋاشىلىعى، «تسيفرلى قازاقستان- 2020» باعدارلاماسىن جۇزەگە اسىرۋ، توتەنشە جاعدايلاردىڭ الدىن الۋ، جولداردى جوندەۋ ىسىنە دە قارجىلاي قولداۋ شارالارى كورسەتىلمەك. الەۋمەتتىك سالا دا نازاردان تىس قالماي، تەگىن ءدارى-دارمەكپەن قامتاماسىز ەتۋگە، ءبىلىم بەرۋ نىساندارىنىڭ ماتەريالدىق-تەحنيكالىق بازاسىن نىعايتۋعا، مەكتەپتەردى كەڭ جولاقتى ينتەرنەت جەلىسىمەن قامتۋعا جانە باسقا دا ماڭىزدى ءىس-شارالارعا قارجى قاراستىرىلدى.

سەسسيا سوڭىندا بىرقاتار ازاماتتار وبلىس اكىمى قولىنان «استانانىڭ 20 جىلدىعى» مەرەكەلىك مەدالىن الدى.

“The Qazaq Times”