AQŞ pen Qıtaydıñ Tınıq mwhittağı tartısı qıza tüsti. Foto: Financial Times.

AQŞ pen Australiyanıñ (Avstraliya) Sırtqı ister jäne Qorğanıs ministrlikteriniñ 2018 jılğa arnalğan konsul'taciya jiını 24 şilde küni öz märesine jetti. Jiınnan keyin taraptar jurnalisterge arnalğan baspasöz konferenciyasın ötkizdi. Taraptardıñ keñeytilgen otırısında jäne baspasöz jiınında bolsın AQŞ pen Qıtaydıñ öñirdegi ıqpalı köbirek talqığa tüsti. Jiın kezinde söylegen söziniñ birinde AQŞ memlekettik hatşısı Pompeo: «Demokratiya qwndılıqtarı men adam qwqığın qadirleuge degen wmtılıs, Tınıq mwhitınıñ oñtüstigindegi aral elderin Qıtaydan köri AQŞ-pen dostasuğa itermeleydi», – dedi.

Osıdan bwrın  Australiya SİM basşısı Qıtaydıñ Oñtüstik Tınıq mwhitı aymağında barğan sayın artıp kele jatqan ıqpalına baylanıstı alañdauşılığın bildirgen bolatın. Baspasöz jiını kezinde australiyalıq bir jurnalist osı mäseleni alğa tarta otırıp,  AQŞ memlekettik hatşısınan bwğan qalay qaraytının jäne Qwrama Ştat tarabı qanday şaralar qabıldaytının swradı.

Jurnalisttiñ swrağına jauap bergen Pompeo: «Amerika Qwrama Ştatı – demokratiyalı qoğam. AQŞ-tıñ ıqpalın keñeytu täsili demokratiyalı emes elderdiñ öz ıqpalın keñeytu äreketterine wqsamaydı. Tarihtan alıp qarğanda, tübinde Oñtüstik Tınıq mwhitı aymağında ğana emes, bükil älemde AQŞ-tıñ tañdağan jolı ğana jeñiske jetetinin köruge boladı», – dedi.

Eki künge jalğasqan konsul'taciyalar barısında Qwrama Ştat pen Australiyanıñ tört birdey ministrligi eki eldiñ diplomatiyalıq jäne äskeri saladağı tığız ıntımaqtastığın anıq bayqattı. Oğan dälel, Australiya qorğanıs küşteri men öñirdegi araldı elderdiñ äskeri ıntımaqtastıq äreketterine AQŞ qarulı küşteriniñ de qatısatın boluı.

Ayta keteyik, osı jıldıñ ekinşi jartısında Australiya armiyası Vanuatu, Fidji, Tonga, Samoa, Solomon jäne Papua-Jaña Gvineya siyaqtı Oñtüstik Tınıq mwhitı aral elderine barıp,  jergilikti jauıngerlermen türli äskeri jattığulardı ötkizedi.

AQŞ pen Qıtaydıñ Tınıq mwhitındağı baqtalastığı barğan sayın qıza tüsude. Oñtüstik Qıtay teñizi, Batıs Tınıq mwhit jağalau elderi, Oñtüstik Tınıq mwhit elderindegi AQŞ-Qıtay tartısı wzaq bolaşaqtıñ kürdeli qayşılığı bolıp şığuı bek mümkin. Soñğı jıldarı Qıtay Tınıq mwhitı aymağındağı şağın eldermen ekonomikalıq jäne sauda baylanıstarın edäuir nığayttı. Bwl Australiya tarabın qattı alañdattı. Sondıqtan da Kanberra ükimeti jaqında Tınıq mwhitındağı şağın elderimen dästürli seriktestikti qamtamasız etu jäne nığaytu üşin birqatar şaralar qabıldadı. Bwğan Qwrama Ştat ta qoldau körsetip otır.

“The Qazaq Times”