Iraktağı eki aptağa sozılğan ereuilden 14 adam qaza tauıp, 700-den astam adam jaraqat aldı. Bwl turalı IRNA aqparattıq agenttigi jergilikti aqparat közderine silteme jasay otırıp habarladı.

Jwmıssızdıq pen äleumettik dağdarıstarğa aşınğan jwrttıñ ereuili eñ äueli eldiñ oñtüstik aymaqtarında bastalğan bolatın. Keyin jappay narazılıq akciyası el ortalığı Bağdat qalasında jalğastı.

Iraktıñ oñtüstik aymaqtarındağı ereuil kezinde qaza bolğandardıñ keybireui qauipsizdik küşteriniñ oğınan ölgeni turalı da aqparattar tarap jatır. Bwl ereuilşilerdiñ qarsılığın tipti de küşeytip jibergen.

Jwmıssızdıq pen türli äleumettik qayşılıqtar, elektr jarığınsız aymaqtardıñ twrğındarı bastağan narazılıq şarası äli de jalğasın tabuda. Olar Irak parlamentiniñ därmensizdigin sınğa alğan.

“The Qazaq Times”