2018 جىلدىڭ 13-15 شىلدە كۇندەرى،  پەتروپاۆل قالاسىندا، سەگىز سەرى باحرامۇلىنىڭ 200 جىلدىعىنا ارنالعان «ەر جانىبەك» حالىقارالىق قوعامدىق قورى مەن سولتۇستىك قازاقستان وبلىسىنىڭ اكىمدىگىنىڭ ۇيىمداستىرۋىندا، دۇنيەجۇزى قازاق جاستارى اراسىندا شاعىن فۋتبولدان ءداستۇرلى «ER JANIBEK CUP-2018» ءتۋرنيرى ءوتتى. 

تۋرينەردىڭ اشىلۋ سالتاناتىنا سولتۇستىك قازاقستان وبلىسى اكىمىنىڭ ورىنباسارى جانداربەك داۋرەن مەن «ەر جانىبەك» حالىقارالىق قوعامدىق قورىنىڭ توراعاسى جەڭىس تۇركيا، قوعام قايراتكەرى بالتاش تۇرسىنباي، عالىم، ۇستاز كۇلاش احمەت قاتارلى كىسىلەر سەگىز سەرىنىڭ ونەرى مەن ومىرىنەن سىر شەرتىپ، تورتكۇل دۇنيەدەن جينالعان قازاق جاستارىنا قازاق ەلىنەن رۋحاني ازىق الىپ قايتۋعا، ءبىر-بىرىمەن دوستاسىپ قايتۋعا شاقىرسا، سولتۇستىك قازاقستان وبلىسىنىڭ ونەرپازدارى سەگىز سەرىنىڭ اندەرىنەن تامىلجىتا سالدى.

تۇركياداعى قازاق جاستارىنىڭ كومادالارىن باستاپ كەلگەن قانداسىمىز ارعىنبەك ونەر «مەن تۇركيا، فرانتسيا، اۆستريا، دانيا قازاقتارىنان كوپ-كوپ سالەم الىپ كەلدىم. قابىل الىڭىزدار. شەتەلدە جۇرگەننەن كەيىن وتانىمىز - قازاقستان ءبىزدى شاقىرىپ،  قول سوزعاننان كەيىن ەلگە قاراي جۇگىرە كەلەمىز عوي. ءبىز جاستارعا قازاقستان دەگەن وتانىمىز، ەلىمىز بار دەگەننەن ارتىق باقىت جوق دەپ ويلايمىن. سوندىقتان وتانىمىزدىڭ تورىندە ءبارىمىزدىڭ باسىمىزدى قوسقاندارىڭىزعا كوپ-كوپ راقمەت ايتامىن»، دەپ ۇيىمداستىرۋشىلارعا العىسىن ءبىلدىردى.

«ER JANIBEK CUP-2018» ءتۋرنيرىن ۇيىمداستىرعان «ەر جانىبەك» حالىقارالى قوعامدىق قورىنىڭ توراعاسى جەڭىس تۇركيا  «سولتۇستىك وڭىردەن كوپتەگەن ۇلى تۇلعالار شىققان. ساكەندەر شىققان، قوجابەرگەن جىراۋ، سەگىز سەرىلەر شىققان. سەگىز سەرىنىڭ 200 جىلدىعىنا وراي  الەمنىڭ ءار بۇرىشىنداعى قازاق جاستارىن ءبىر-بىرىمەن تانىسسىن، قازاق ەلىمەن، قازاقتىڭ جەرىمەن تانىسىپ، تاۋەلسىز ازامات ەكەندىكتەرىن سەزىنسىن دەپ جينادىق. وسىمەن 4-شى جىل وتكەن تۋرنيرگە فرانتسيا، اۆستريا، دانيا، يتاليا، تۇركيا، قىتاي، رەسەي، موڭعوليا، يران، وزبەكستان جانە قىرعىزستانداعى ەتنيكالىق قازاق جاستارى مەن قازاقستاننىڭ قالالارى مەن وبلىستارىنان جالپى 25 فۋتبول كومانداسى قاتىستى. قازاقتىڭ ءار وبلىسىنان شىققان ايگىلى تۇلعالار جەتەرلىك، بۇدان كەيىنگى جىلدارى وزگە وبلىستاردىڭ اكىمشىلىكتەرى بىرگە جۇمىس جاسايمىز دەسە باسقا وبلىستاردا دا وتكىزىپ، سول وبلىستارىمىز بەن تۇلعالارىمىزدى دۇنيەجۇزى قازاق جاستارىنا تانىستىرۋعا دايىنبىز. بۇل رەتكى وتكەن شاراعا قاتىسقان جاستاردا قازاق جەرىنىڭ سولتۇستىگىمەن تانىسىپ قايتسا، سولتۇستىك جۇرتى دا قازاق باۋىرلارىن كورىپ قۋانىپ قالدى»، - دەپ شارانىڭ باستى ماقساتىن ايتىپ ءوتتى.

جارىس قورىتىندىسى بويىنشا، ءى-ورىندى (1 000 000 تەڭگە قارجىلاي جۇلدە) الماتى قالاسىنان «ساۋىر» كومانداسى، ءىى-ورىندى (500 000 تەڭگە قارجىلاي جۇلدە)  «بىرلىك كەرۋەن» (الماتى), ءىىى-ورىندى (300 000 تەڭگە قارجىلاي جۇلدە)  ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتى، ال ءتورتىنشى ورىندى (200 000 تەڭگە قارجىلاي جۇلدە) پەتروپاۆلدىق «دينامو» كومانداسى يەمدەندى. ولاردىڭ ىشىندە، «ۇزدىك شابۋىلشى» رەتىندە — رۋسلان كوپەەۆ (دينامو، پەتروپاۆل), "ۇزدىك قاقپاشى" — مۇحاماديا احمادەەۆ (ش.ءۋاليحانوۆ اتىنداعى كمۋ), "ۇزدىك قورعاۋشى" — ەركىن نۇرجانوۆ (بىرلىك كەرۋەن، الماتى), «سۇرمەرگەن» (بومباردير) ۇزدىگى رەتىندە — قۋانىش سوۆەتوۆ (19-دوپ، ساۋىر، الماتى) انىقتالدى. ال، «استانانىڭ 20 جىلدىعى» نوميناتسياسى بويىنشا — ىستامبۇل، تۇركيا جەڭىسكە جەتسە، «ۇلتتىق رۋحتى» — "FC Europe" كومانداسى (اۆستريا، ۆەنا) قانجىعاعا بايلادى.

الەمنىڭ ءار ەلىنەن كەلگەن جاستار سولتۇستىكتىڭ كوركەم تابيعاتىنا قىزىعىپ، ءتىپتى اراسىندا «قىزىلجارعا كوشىپ كەلگىم كەلەدى» دەگەندەرى دە تابىلدى. «ەر جانىبەك» قورى ۇيىمداستىرعان تۋرنيرگە وسىمەن ءتورتىنشى رەت قاتىسىقانى دا، ءبىرىنشى رەت كەلىپ وتىرعاندار دا بار ەكەن. وسى 25 كوماندانىڭ ءبىرى م. قوزىباەۆ اتىندا سولتۇستىك قازاقستان ۋنيۆەرسيەتىنىڭ دايىندىق بولىمىندە وقيتىن شەتەلدەن كەلگەن قازاق جاستارىنان قۇرالىپتى. دايىندىق بولىمدەگى موڭعوليا مەن قحر-نان كەلگەن ستۋدەنتتەر ءتۋرنيردىڭ ەكىنشى كۇنى جوعارعى وقۋ ورىنا ءتۇسۋ ءۇشىن ەمتيحان تاپسىرىپ جاتتى. بۇل كوماندانىڭ جىگىتتەرى اتالعان ۋنيۆەريتەتكە وقۋعا ءتۇسىپ، وسى قالادا قالىپ، اتا-انا، تۋىس-تۋعاندارىن كوشىرىپ اكەلمەك نيەتتەرى بارىن جەتكىزدى.

شەتەلدەن كەلگەن ءبىراز جاستار قۋانىشتى كوڭىل كۇيلەرىن ءبىلدىرىپ، ءوز وي پىكىرلەرىن ايتىپ جاتتى. سونىڭ ءبىرى دانيالىق باۋىرىمز امير ەگىمبەت «بۇل تۋرنيرگە ءبىرىنشى رەت قاتىسىپ وتىرمىن. قازاقستانعا بۇعان دەيىن ءۇش رەت كەلگەنمىن. تۋرنير ماعان قاتتى ۇنادى. باسقا ەلدەردەن كەلگەن دوستارىمىزبەن تانىسىپ جاتىرمىز. ۆەنادان كەلگەن 4 بالامەن بىرگە ەكى دانيالىق جىگىت ەۋروپا كومانداسى رەتىندە قاتىسىپ وتىرمىز. دانيادا 8,9 وتباسى قازاق بارمىز. ايت مەرەكەلەرىندە، توي-تومالاقتا باس قوسىپ تۇرامىز. وتباسىمىزدا اتا-انامىز باسقا تىلدە سويلەۋگە جول بەرمەيدى، سوندىقتان بىزگە باسقا قازاق بالالارىمەن سويلەسۋگە ەشقانداي قيىندىق تۋمايدى. قازىر دانيادا ستۋدەنتپىن، قازاقستانعا كەلسەم وقۋىمدى بىتىرگەننەن كەيىن كەلەتىن شىعارمىن» - دەسە، اۆستريانىڭ ۆەنا قالاسىنان كەلگەن ەرجۇما اتتى جىگىت «ءبىز اۋروپا كومانداسى رەتىندە قاتىسىپ وتىرمىز. ۆەنادان 4 بالا كەلدىك. مۇندا قازاق قانداستارىمىزبەن باسىمىز قوسىلىپ قۋانىپ جاتىرمىز. وسىنداي شارالاردىڭ بولعانى بىزگە وتە قاجەت. استانا، پەتروپاۆل قالالارى وتە ۇناپ جاتىر. وسى شارانى ۇيىمداستىرعان «ەر جانىبەك» قورىنا راقمەت!» دەگەن العىسىن جەتكىزدى.

يراننان كوشىپ كەلىپ الماتى وبلىسىندا تۇرىپ جاتقان قانداسىمىز جانپەيىس رەزو «ءبىز بۇل جارىسقا وسىمەن 3- رەت قاتىسىپ وتىرمىز. رەسەيدىڭ ءبىر قالاسىندا قازاق بار ما دەسەم؟ بۇل  جولى 4 قالاسىندا قازاق بارىن ءبىلدىم، اۆستريادا قازاقتار تۇراتىنىن ءبىلدىم. سول سياقتى قاتىسقان سايىن كوپتەگەن دوس تاۋىپ كەتەمىز. ءبارىمىز قازاق بولعان سوڭ ءبىر-بىرىمىزبەن تەز ءتىل تابىسىپ جاتامىز. وسى ورايدا باسىمىزدى قوسىپ جاتقان «ەر جانىبەك» قورىنا راقمەتىمدى ايتقىم كەلەدى. سولتۇستىك قازاقستانعا كەلىپ، تابيعاتىن كورىپ قۋانىپ قالدىق. جىلدا كەلىپ تۇرسام، مۇمكىن بولسا وسى جەرگە كوشىپ كەلسەم دەگەن ويىم بار. مۇندا قازاقتار از تۇرادى ەكەن. ءبىز قازاقستانعا يراننان 20 مىڭداي قازاق كوشىپ كەلگەنبىز. كەلگەن 20 مىڭ قازاق ءوسىپ، 100 مىڭ قازاققا جەتتىك. بىزدە ەرتە ۇيلەنەدى. مۇنداعى دوستارىمنىڭ كەيبىرىنىڭ 3,4 بالاسى بار. مەن دە وتكەن اپتادا ۇيلەندىم. تويىمدى وتكىزە سالا، قىزىلجارعا كەلىپ تۇرمىن. بولاشاقتا وسى قالانىڭ تۇرعىنى بولىپ، وسىندا ءوسىپ-ونسەك دەگەن نيەتىم بار»، - دەپ اقتارىلدى.

رەزونىڭ  وسى ءسوزى قازاعىن كۇتىپ جاتقان كەڭ بايتاق دالانىڭ شەتىنە ورنالاسقان، كورشىمىز كيگىزگەن ەسكى شەكپەنىن ءالى شەشپەي پەتروپاۆل اتالىپ جۇرگەن قالاعا دۇنيەجۇزى قازاق جاستارىنىڭ باسىن قوسۋداعى ماقساتتىڭ ورىندالعانىن بىلدىرسە كەرەك. ءدۇيىم جۇرتتى جيناعان جينالىستىڭ ءتۇيىنى دە وسى بولماق.

Jebeu.kz

“The Qazaq Times”