Jüsip Añsar bas jüldeni jeñip aldı. Foto: MJSM. Baspasöz qızmeti.

3 şilde küni Astanadağı  «Qazaqstan» koncert zalında Astana qalasınıñ 20 jıldıq mereytoyına arnalğan İ «Burabay Summer Fest» jasöspirim talanttardıñ halıqaralıq festivaliniñ ayaqtaluına arnalğan Gala-koncert ötti. Şaranı QR Mädeniet jäne sport ministrligi arnayı wyımdastırğan.

Atalğan ministrlik taratqan mälimetke qarağanda, bayqauğa qatısuğa respublikamızdıñ jer-jerinen jäne şetelden (Qıtay, Belarusiya, Resey, Qırğızstan, Özbekstan, Äzirbayjan jäne Türkiya) darındı balalar vokal, horeografiya, mänerlep oqu jäne aspapta orındau türleri boyınşa 17 mausımnan bastap 400 den astam önerpazdar qatıstı.

Keşegi aqtıq kezeñde finalister anıqtaldı. Nätijesinde bas jülde ielengender: «Körkemdik oqu» nominaciyası – Tilek Nwrqoja (Qızılorda oblısı), «Halıq bi» nominaciyası – Djumaliev Ratmir (Almatı qalası), «Dästürli öner (jeke orındauşılıq)» nominaciyası – Älimqwl Swltan (Jambıl oblısı), «Klassikalıq öner» nominaciyası – Idırısova Kamila, «Dästürli öner (ansambl')» nominaciyası – «Jetigen» ansambli (Türkistan oblısı), «Dästürli än» nominaciyası – İliyasova Ayjan, «Estradalıq än» nominaciyası – Basitova Karina (Almatı qalası), «Akademiyalıq än» nominaciyası – Jüsip Ansar (Aqtöbe oblısı). Festival'dıñ bas jüldesin QR Mädeniet jäne sport ministri Arıstanbek Mwhamediwlı – Qazaqstan Respublikasınıñ Prezidenti Nazarbaev Nwrswltan Äbişwlı atınan aq royal' men Los-Andjelestegi äygili «UNIVERSAL STUDIOS HOLLYWOOD» kinostudiyasına baru mümkindigin Jüsip Ansarğa tabıstadı.

Ayta keteyik, Bas Jülde ielengen Jüsip Ansar Aqtöbe oblısınıñ tuması. Ansar «Akademiyalıq än» nominaciyası boyınşa bayqauğa qatısıp, mıqtılardıñ qatarınan tabıldı. Ansar Aqtöbedegi №1 Balalar muzıkalıq mektebinde «vokal» böliminen däris alğan.

“The Qazaq Times”