ءجاسوسپىرىم تالانتتاردىڭ حالىقارالىق فەستيۆالىنىڭ جەڭىمپازى انىقتالدى

3 شىلدە كۇنى استاناداعى  «قازاقستان» كونتسەرت زالىندا استانا قالاسىنىڭ 20 جىلدىق مەرەيتويىنا ارنالعان ءى «Burabay Summer Fest» ءجاسوسپىرىم تالانتتاردىڭ حالىقارالىق فەستيۆالىنىڭ اياقتالۋىنا ارنالعان گالا-كونتسەرت ءوتتى. شارانى قر مادەنيەت جانە سپورت مينيسترلىگى ارنايى ۇيىمداستىرعان.

اتالعان مينيسترلىك تاراتقان مالىمەتكە قاراعاندا، بايقاۋعا قاتىسۋعا رەسپۋبليكامىزدىڭ جەر-جەرىنەن جانە شەتەلدەن (قىتاي، بەلارۋسيا، رەسەي، قىرعىزستان، وزبەكستان، ءازىربايجان جانە تۇركيا) دارىندى بالالار ۆوكال، حورەوگرافيا، مانەرلەپ وقۋ جانە اسپاپتا ورىنداۋ تۇرلەرى بويىنشا 17 ماۋسىمنان باستاپ 400 دەن استام ونەرپازدار قاتىستى.

كەشەگى اقتىق كەزەڭدە فيناليستەر انىقتالدى. ناتيجەسىندە باس جۇلدە يەلەنگەندەر: «كوركەمدىك وقۋ» نوميناتسياسى – تىلەك نۇرقوجا (قىزىلوردا وبلىسى), «حالىق بي» نوميناتسياسى – دجۋماليەۆ راتمير (الماتى قالاسى), «ءداستۇرلى ونەر (جەكە ورىنداۋشىلىق)» نوميناتسياسى – الىمقۇل سۇلتان (جامبىل وبلىسى), «كلاسسيكالىق ونەر» نوميناتسياسى – ىدىرىسوۆا كاميلا، «ءداستۇرلى ونەر (انسامبل)» نوميناتسياسى – «جەتىگەن» ءانسامبلى (تۇركىستان وبلىسى), «ءداستۇرلى ءان» نوميناتسياسى – ءىلياسوۆا ايجان، «ەسترادالىق ءان» نوميناتسياسى – باسيتوۆا كارينا (الماتى قالاسى), «اكادەميالىق ءان» نوميناتسياسى – ءجۇسىپ انسار (اقتوبە وبلىسى). فەستيۆالدىڭ باس جۇلدەسىن قر مادەنيەت جانە سپورت ءمينيسترى ارىستانبەك مۇحامەديۇلى – قازاقستان رەسپۋبليكاسىنىڭ پرەزيدەنتى نازارباەۆ نۇرسۇلتان ءابىشۇلى اتىنان اق رويال مەن لوس-اندجەلەستەگى ايگىلى «UNIVERSAL STUDIOS HOLLYWOOD» كينوستۋدياسىنا بارۋ مۇمكىندىگىن ءجۇسىپ انسارعا تابىستادى.

ايتا كەتەيىك، باس جۇلدە يەلەنگەن ءجۇسىپ انسار اقتوبە وبلىسىنىڭ تۋماسى. انسار «اكادەميالىق ءان» نوميناتسياسى بويىنشا بايقاۋعا قاتىسىپ، مىقتىلاردىڭ قاتارىنان تابىلدى. انسار اقتوبەدەگى №1 بالالار مۋزىكالىق مەكتەبىندە «ۆوكال» بولىمىنەن ءدارىس العان.

“The Qazaq Times”