Mettistiñ qorğanıs ministri bolıp tağayındalğan kezi. Foto: The Japan Times.

AQŞ-tıñ qorğanıs ministri Jeyms Mettis beysenbi küni Seulge saparlay barıp, Oñtüstik Koreya qorğanıs ministrimen kezdesti. Kezdesude Soltüstik Koreyanıñ yadrolıq qarusızdanu mäselesin talqığa saldı. Mettis sol eldiñ lauazımdı twlğaların Oñtüstik Koreyanıñ qauipsizdigin qamtamasız etude AQŞ-tıñ wstanımı äli de berik ekenine tağı bir retki sendirdi. Bwl turalı VOA habarladı.

Mausım ayınıñ bas şeninde AQŞ prezidenti men Soltüstik Koreya lideriniñ kezdesuinen soñ, Oñtüstik Koreya tarabı AQŞ armiyasınıñ tübekten ketip qaluınan alañday bastadı. Sebebi, eger Soltüstik Koreya tarabı AQŞ armiyasınıñ tübekten ketuin, yadrolıq qarusızdanudıñ öteui retinde talap etse, bwl Seul men Uaşington arasındağı kelisimge keri äserin tigizui mümkni edi.

Prezident Tramptıñ keybir şeşimderi Tınıq mwhitınıñ batıs jağalauındağı AQŞ-tıñ odaqtastarın alañdattı. Aytalıq, AQŞ-Oñtüstik Koreyanıñ birlesken äskeri jattığularınıñ toqtatıluı Seuldi oylandırdı.

Alayda, Mettis bwl saparında: «Birlesken jattığudıñ toqtatıluı beybitşilik procesi üşin. AQŞ pen Oñtüstik Koreyanıñ äskeri ıntımaqtastığı saqtalıp qala beredi. Korey tübegindegi amerikalı äskerlerdiñ sanı da özgeristerge wşıramaydı. Eki eldiñ qarulı küşteri kez-kelgen qiınşılıqtarğa birge qarsı twradı», – dep sendirdi.

Qıtay saparınan qaytar jolında, Mettis Oñtüstik Koreya jäne Japoniyanıñ joğarı lauazımdılarımen kezdesti. Qıtay saparında QHR törağası Şi Jinpiñmen kezdesip, AQŞ-Qıtay arasındağı eñ salmaqtı qayşılıqtardı talqıladı.

 “The Qazaq Times”