مەتتيستىڭ قورعانىس ءمينيسترى بولىپ تاعايىندالعان كەزى. فوتو: The Japan Times.

اقش-تىڭ قورعانىس ءمينيسترى جەيمس مەتتيس بەيسەنبى كۇنى سەۋلگە ساپارلاي بارىپ، وڭتۇستىك كورەيا قورعانىس مينيسترىمەن كەزدەستى. كەزدەسۋدە سولتۇستىك كورەيانىڭ يادرولىق قارۋسىزدانۋ ماسەلەسىن تالقىعا سالدى. مەتتيس سول ەلدىڭ لاۋازىمدى تۇلعالارىن وڭتۇستىك كورەيانىڭ قاۋىپسىزدىگىن قامتاماسىز ەتۋدە اقش-تىڭ ۇستانىمى ءالى دە بەرىك ەكەنىنە تاعى ءبىر رەتكى سەندىردى. بۇل تۋرالى VOA حابارلادى.

ماۋسىم ايىنىڭ باس شەنىندە اقش پرەزيدەنتى مەن سولتۇستىك كورەيا ليدەرىنىڭ كەزدەسۋىنەن سوڭ، وڭتۇستىك كورەيا تارابى اقش ارمياسىنىڭ تۇبەكتەن كەتىپ قالۋىنان الاڭداي باستادى. سەبەبى، ەگەر سولتۇستىك كورەيا تارابى اقش ارمياسىنىڭ تۇبەكتەن كەتۋىن، يادرولىق قارۋسىزدانۋدىڭ وتەۋى رەتىندە تالاپ ەتسە، بۇل سەۋل مەن ۋاشينگتون اراسىنداعى كەلىسىمگە كەرى اسەرىن تيگىزۋى مۇمكنى ەدى.

پرەزيدەنت ترامپتىڭ كەيبىر شەشىمدەرى تىنىق مۇحيتىنىڭ باتىس جاعالاۋىنداعى اقش-تىڭ وداقتاستارىن الاڭداتتى. ايتالىق، اقش-وڭتۇستىك كورەيانىڭ بىرلەسكەن اسكەري جاتتىعۋلارىنىڭ توقتاتىلۋى سەۋلدى ويلاندىردى.

الايدا، مەتتيس بۇل ساپارىندا: «بىرلەسكەن جاتتىعۋدىڭ توقتاتىلۋى بەيبىتشىلىك پروتسەسى ءۇشىن. اقش پەن وڭتۇستىك كورەيانىڭ اسكەري ىنتىماقتاستىعى ساقتالىپ قالا بەرەدى. كورەي تۇبەگىندەگى امەريكالى اسكەرلەردىڭ سانى دا وزگەرىستەرگە ۇشىرامايدى. ەكى ەلدىڭ قارۋلى كۇشتەرى كەز-كەلگەن قيىنشىلىقتارعا بىرگە قارسى تۇرادى»، – دەپ سەندىردى.

قىتاي ساپارىنان قايتار جولىندا، مەتتيس وڭتۇستىك كورەيا جانە جاپونيانىڭ جوعارى لاۋازىمدىلارىمەن كەزدەستى. قىتاي ساپارىندا قحر توراعاسى شي جينپيڭمەن كەزدەسىپ، اقش-قىتاي اراسىنداعى ەڭ سالماقتى قايشىلىقتاردى تالقىلادى.

 “The Qazaq Times”