Iran men Marokko arasındağı jarıs. Foto: IRNA.

Mamır ayında AQŞ-tıñ Iranğa ekonomikalıq sankciyanı qayta qalpına keltirui, IIR ükimetine ğana emes, kezekti futboldan Älem Çempionatına qatısatın Wlttıq qwramasına da äser etti. Iran komandası ÄÇ dodasına qatısu üşin de az bolmağan qiınşılıqtardı jeñuine tura keldi.

Aytalıq, bwğan deyin Iran Wlttıq qwramasına demeuşilik etip kelgen nike kompaniyası, AQŞ sankciyasınan qorqıp, orta jolda Iran Wlttıq qwramasımen jasasqan kelisimdi toqtattı. Sonıñ saldarınan irandıq sportşılar 70 payız jeñildikpen satılğan Adidas sporttıq kiimderin satıp aluğa mäjbür bolğan. Tipti qwrama sabındağı köptegen oyınşılar futbolğa kietin arnayı sporttıq ayaq kiimderin Reseyge kelgennen keyin ğana, dükenderdi aralap satıp alğan. Keybireui europalıq sportşılar arasındağı tanıs-bilisteriniñ kömegine jüginip, «Europadan ala keluin» ötinse kerek.

Iran qwramasınıñ jarısqa deyingi qiınşılıqtarı bwl ğana emes. Älem elderi arasındağı sayasattıñ salqını Iran komandasınıñ joldastıq kezdesu ötkizuine de kedergi bolğan. 2006-2012 jıldar arasında Iran wlttıq qwraması joldastıq kezdesuge şaqırğan komandalardıñ bäir derlik, sayasi twraqsızdıq pen qauipsizdik mäselesin alğa tartıp, kezdesuden bas tartıp otırğan. Al, Grekiyamen 2 mausımda Stambul qalasında ötkizudi josparlağan joldastıq kezdesui, Grekiya men Türkiya arasındağı sayasi arazdıqqa baylanıstı küşinen qaldırılğan.  

Wlttıq qwramanıñ alğaşqı jeñisin toylağan irandıqtar. Foto: IRNA.

Degenmen, osı qiınşılıqtardı artta qaldırıp, Iran qwraması alğaşqı oyındağı jeñisimen irandıqtarğa quanış sıyladı. Qwrama oyınşılarınıñ aytuınşa, Älem Çempionı atağınan ümiti az bolsa da, Iran qwramasınıñ bastı maqsatı – sapalı oyın körsetu.

“The Qazaq Times”