AQŞ biligi Iranğa bağıttalğan sankciyalar tizimin keñeytip, oğan jergilikti sud'yalar Seyed Mahmud Sadati men Mohammad Soltanidi jäne Şiraz qalasındağı üş türme jäne revolyuciyalıq sottıñ keñsesin qostı. Bwl turalı AQŞ Qarjı ministrliginiñ saytında habarlandı.

AQŞ Memlekettik hatşısı Mayk Pompeonıñ mälimdeuinşe, tizimge engizilgen adamdar men qwrılımdardıñ Irandağı adam qwqıqtarın bwzuğa qatısı bar. Memlekettik departamenttiñ baspasöz qızmeti taratqan mälimdemede: «Bügin AQŞ Irannıñ birneşe lauazımdı twlğaları men wyımdarına adam qwqıqtarın öreskel bwzğanı üşin sankciyalar engizdi. Bwdan basqa atalğan twlğalar azaptau jäne ar-namıstı qorlaytın is-äreketterge barıp, twrğındardı zañsız jazalağan», – delingen.

Uaşingtonnıñ qatañ qaulısına ilikken mekemeler Şiraz, Urmiya, Meşhed qalalarında ornalasqan.

Pompeonıñ aytuınşa, sud'ya Sadati men revolyuciyalıq sot Şirazğa engizilgen sankciyalar 27 jastağı paluan Navid Afkaridiñ ölimine baylanıstı engizilgen. «Jasırın türde orındalğan ölim jazasına deyin, paluan Navid Abdelabad türmesinde azaptaldı. Onı ölim jazasına kesu – öreskel äreket», – dedi.

Irannıñ Fars agenttigi 12 qırküyekte 2018 jıldıñ qırküyeginde Şiraz qalasında küzetşini öltirdi dep ayıptalğan Navid Afkarige qatıstı ölim ükiminiñ orındalğanı turalı habarlağan.

Bwğan deyin AQŞ prezidenti Donal'd Tramp Tehrandı sot tağayındağan jazanı alıp tastauğa şaqırıp, «Navid Afkaridi twtqındaudıñ naqtı sebebi – ükimetke qarsı demonstraciyağa qatısu», degen pikir bildirdi. Halıqaralıq Olimpiada komitetiniñ (HOK) prezidenti Tomas Bah Iran prezidenti Hasan Ruhanige paluandı ölim jazasına kespeu turalı ötiniş bildirgen. Ükim orındalğannan keyin HOK prezidenti älemniñ tükpir-tükpirinen kelgen sportşılar, Irannıñ Wlttıq Olimpiada komiteti, Birikken küres älemi Iran biliginiñ «ädiletsiz ükimine» qarsı jeñilis tapqanın ayttı.

"The Qazaq Times"