اقش سانكتسياسىنىڭ سالقىنى تيسە دە الەم بىرىنشىلىگىنە قاتىسۋعا بارعان كوماندا

مامىر ايىندا اقش-تىڭ يرانعا ەكونوميكالىق سانكتسيانى قايتا قالپىنا كەلتىرۋى، ير ۇكىمەتىنە عانا ەمەس، كەزەكتى فۋتبولدان الەم چەمپيوناتىنا قاتىساتىن ۇلتتىق قۇراماسىنا دا اسەر ەتتى. يران كومانداسى ءاچ دوداسىنا قاتىسۋ ءۇشىن دە از بولماعان قيىنشىلىقتاردى جەڭۋىنە تۋرا كەلدى.

ايتالىق, بۇعان دەيىن يران ۇلتتىق قۇراماسىنا دەمەۋشىلىك ەتىپ كەلگەن nike كومپانياسى, اقش سانكتسياسىنان قورقىپ, ورتا جولدا يران ۇلتتىق قۇراماسىمەن جاساسقان كەلىسىمدى توقتاتتى. سونىڭ سالدارىنان يراندىق سپورتشىلار 70 پايىز جەڭىلدىكپەن ساتىلعان Adidas سپورتتىق كيىمدەرىن ساتىپ الۋعا ءماجبۇر بولعان. ءتىپتى قۇراما سابىنداعى كوپتەگەن ويىنشىلار فۋتبولعا كيەتىن ارنايى سپورتتىق اياق كيىمدەرىن رەسەيگە كەلگەننەن كەيىن عانا، دۇكەندەردى ارالاپ ساتىپ العان. كەيبىرەۋى ەۋروپالىق سپورتشىلار اراسىنداعى تانىس-بىلىستەرىنىڭ كومەگىنە جۇگىنىپ، «ەۋروپادان الا كەلۋىن» وتىنسە كەرەك.

يران قۇراماسىنىڭ جارىسقا دەيىنگى قيىنشىلىقتارى بۇل عانا ەمەس. الەم ەلدەرى اراسىنداعى ساياساتتىڭ سالقىنى يران كومانداسىنىڭ جولداستىق كەزدەسۋ وتكىزۋىنە دە كەدەرگى بولعان. 2006-2012 جىلدار اراسىندا يران ۇلتتىق قۇراماسى جولداستىق كەزدەسۋگە شاقىرعان كوماندالاردىڭ ءباىر دەرلىك، ساياسي تۇراقسىزدىق پەن قاۋىپسىزدىك ماسەلەسىن العا تارتىپ، كەزدەسۋدەن باس تارتىپ وتىرعان. ال، گرەكيامەن 2 ماۋسىمدا ستامبۋل قالاسىندا وتكىزۋدى جوسپارلاعان جولداستىق كەزدەسۋى، گرەكيا مەن تۇركيا اراسىنداعى ساياسي ارازدىققا بايلانىستى كۇشىنەن قالدىرىلعان.  

ۇلتتىق قۇرامانىڭ العاشقى جەڭىسىن تويلاعان يراندىقتار. فوتو: IRNA.

دەگەنمەن، وسى قيىنشىلىقتاردى ارتتا قالدىرىپ، يران قۇراماسى العاشقى ويىنداعى جەڭىسىمەن يراندىقتارعا قۋانىش سىيلادى. قۇراما ويىنشىلارىنىڭ ايتۋىنشا، الەم چەمپيونى اتاعىنان ءۇمىتى از بولسا دا، يران قۇراماسىنىڭ باستى ماقساتى – ساپالى ويىن كورسەتۋ.

“The Qazaq Times”