ŞIW-nıñ kezekti otırısı Qıtaydıñ Çiñdau jerinde 9 mausımda bastaladı. Foto: People.

AQŞ pen Iran qarım-qatınası uşığıp twrğan kezde, Qıtay basşısı Şi Jinpiñ Iran prezidenti Hasan Ruhanimen arnayı kezdesu ötkizbek. KHR men IIR basşılarınıñ kezdesui Şanhay Intımaqtastıq Wyımınıñ 9-10 mausım künderi ötetin jinalısına oray ötedi dep kütilude. Bwl turalı «People» basılımı.

Aqparat közderiniñ mälimetine qarağanda, Iran prezidenti ŞIW mäjilisinde Iran yadrolıq mäselesin ortağa qoymaq. Mamırdıñ soñında Qwrama Ştat Iran yadrolıq kelisiminen bas tartqannan keyin, Qıtay bwl vakuumdı toltıruğa äzir ekenin bildirip otır.

Qıtay basşısı osığan deyin de 2015 jılğı Iran yadrolıq kelisimine tabandı bolatının jetkizgen. Al prezident Tramp mälimdemesinde, bwl kelisimnen bas tartuğa sebep bolatın ülken bir problema bar ekenin alğa tartqan.

Päkistandıq halıqaralıq sarapşı Liviz VOA News-ke bergen swhbatında, Qıtay ŞIW jinalısınan paydalanıp öziniñ ıqpalın arttıruğa mümkindik aladı jäne Iranmen sauda baylanısın damıtuğa oray tabadı. Sebebi, Iran mäselesine baylanıstı Qwrama Ştattıñ Tayau Şığıstağı ornı bosap qaldı. Qıtay bwl orındı ielenuge tırısadı.

Esteriñizde bolsa, Astanada ötken ŞIW otırısında terrorizm, separatizm, ekstremizm jäne kiberqauipsizdik mäseleleri talqılanadı. Al, kezekti jinalısqa Iran prezidentiniñ qatısuı bwl wyımnıñ Iran yadrolıq mäselesin talqığa salatının anıq körsete bastadı. Şanhay Intımaqtastıq Wyımınıñ Resey jäne Qıtay sındı eki negizgi lideri Päkistan, Ündistan jäne Irandı Batıs elderinen köri irgeles jatqan özderimen ıntımaqtasuğa şaqıruı mümkin.

Joğarı da atalğan päkistandıq sarapşınıñ aytuınşa, Qıtay men AQŞ qarım-qatınasınıñ aldağı jağdayı kezekti ŞIW otırısınıñ deklaraciyasına tikeley baylanıstı. Alayda, eki el tım auqımdı ekonomikalıq müddege baylanğan, sondıqtanda ıntımaqtastıqtı jalğastıra berui mümkin.

Şanhay Intımaqtastıq Wyımı 2001 jılı qwrılğan (1996 jılı Şanhay bestigi dep atalğan). Maqsatı – aymaqtıq qauipsizdik mäselelerin ortaq şeşu. Soñğı kezde islam ekstremizmine ortaq qarsı twru bağıtı köbirek nazarğa alınğan. Qwramında Qıtay men Reseyden tıs, Qazaqstan, Qırğızstan, Özbekstan jäne Täjikstan elderi bar. Bıltır Astana otırısında Ündistan men Päkistan atalmış wyımğa müşe bolıp kirdi. Bwl ŞWI-nıñ territoriyalıq, halıq sanı, ekonomika jäne yadrolıq salmağın arttıra tüsti. Sonımen birge, Iran Islam Respublikası da atalğan wyımğa müşe boluğa ümitker.

“The Qazaq Times”