Uran-9. Foto: MIL.RU/FACEBOOK

Resey «Jeñis künine» arnalğan äskeri paradta alıstan basqarılatın tankilerin, basqa da birqatar jaña soğıs qwraldarın körsetip, olardıñ Süriyadağı soğısta sınaqtan ötkizilgenin mälimdedi. Aytalıq, Uran-9 attı tankteri zımıran, zeñbirek jäne pulemetpen jabdıqtalğan. Keñes odağında qalıptasqan äskeri paradta jaña soğıs qwraldarın körsetu dästürin Resey prezidenti Vladimir Putin qayta qalpına keltirdi. Bwl BBC nazarın audardı.

Quattı armiya Reseydiñ wlttıq negizderiniñ biri bolıp qalıptasıp keledi. Degenmen, BBC-diñ pikirine sensek, «Qırğiqabaq soğıs jıldarında» Keñes odağı barlıq qarajattardı äskeri quatqa jwmsay berip, soñında memleket bankrot bolğan desedi. Keñes odağı ıdırağannan keyin Resey armiyası dağdarısqa wşırap, qorğanıs byudjeti kürt qısqarıp ketken. Putin bilikke kelgennen keyin Resey armiyasın zamanaui, quattı küşke aynaldırdı.

Uran-9 Süriya jerinde mina tazalau qızmetin atqardı. Foto: MIL.RU/FACEBOOK.

Bügin Mäskeudegi paradta wşqışsız wşaqtar, kemege qarsı zımırandar jäne jayau äskerlerge arnalğan kölikter körsetildi. Äsirese, Uran-9 attı tank reseylik basılımdar jağınan köbirek maqtaldı. Onıñ Süriyadağı soğısta jaqsı nätije körsetkenin jarısa jazuda. Atalğan tank mina tazalau operaciyasına da qabiletti ekeni aytıluda. Uran-9 nısananı özi taba aladı, tek şabuıl jasau bwyrığı 3 şaqırım qaşıqtıqta ornalasqan bas ştab arqılı beriledi. Ol Süriyadağı Deir äz-Zor, Aleppo, Palmira jerlerindegi soğısta mina tazalau qızmetin atqarğan. «Gazeta.ru» basılımı Uran-9-dıñ kömegimen, Süriyadağı Resey küşteri közdeuli jerge tez jetip otırğanın jazdı.

AM-1 kölikteri. Foto: MIL.RU/FACEBOOK.

Mäskeude jwrtqa körsetken äskeri tehnikanıñ biri, jayau äskerlerge arnalğan AM-1 motocikli. Bwl kölikterge arnayı pulemet ornatılğan, sonday-aq, jayau äskerge kerekti jabdıqtarı tolıq. Äsirese, qarlı dalalar men qwmdı alqaptarda öz rölin äygileydi.

Paradta körsetilgen tağı bir jaña tehnika – «Korsar» dronı. Bwl wşqışsız wşu qwrılğısı aua-rayınıñ qolaysız kezinde de barlau jwmıstarın atqara aladı. Tipti alıs aralıqqa jük tasımaldau qabileti de bar. Sonımen birge, «Korsar» dronın da zımıran şabuılın jasaytın qabilet te bar. «Korsar» on sağat boyı, 6 şaqırım biiktikte wşa aladı. Alıs wşu aralığı 160 şaqırımğa deyin jetedi. Resey Qorğanıs ministrliginiñ mälimetinşe Reseyde bwnday drondardan birneşeui bar.

"Korsar". Foto: MIL.RU/FACEBOOK.

Mäskeu keñistiginde tikwşaqtar men äskeri wşaqtarda körindi. Mig-31 wşaqtarı 3-4 ay bwrın älemge tanıs bolğan «Qanjar» raketalarımen wşıp ötpek. Putinniñ mälimdemesinde, qorğanıs raketalarınan jıldam wşatın «Qanjar» älemniñ eşbir zımıran qorğanıs jüyesine wstatpaydı jäne ğalamşardıñ kez-kelgen nüktesine jetedi. Mamandardıñ aytuınşa «Qanjar» osığan deyin Reseydiñ «Eskendir» attı zımıranınıñ jaña ülgisi.

Parad jañalığınıñ eñ körnektileriniñ biri jañadan jasalğan Su-57 (T-50 dep te ataydı) soğıs wşağı. Ol osığan deyin Resey äue küşterinde eskirip bara jatqan Mig-29 jäne Su-27 wşaqtarınıñ orının almastıradı dep kütilude.

Su-57 soğıs wşağı. Foto: MIL.RU/FACEBOOK.

Bir sözben aytqanda Resey Batıs elderiniñ ekonomikalıq qısımı astında, öziniñ mığım äskeri quatımen azu tisin körsetpek. Reseydiñ älemge äskeri tehnikalarımen aybar şegui tek bwl ğana emes, bıltır ötken «Batıs-2017» äskeri-oqu jattığuında da Resey soğıs quatın anıq bayqatqan. Alayda, täuelsiz sarapşılardıñ pikirinşe, sankciya soqqısı jeter jerine äli jetip bolğan joq. Bwl quattı armiyanıñ da byudjettik dağdarısı köp wzamay boladı degendi eskertedi.

 “The Qazaq Times”