ماسكەۋدەگى پاراد: رەسەي ارمياسى قانداي جاڭا قارۋلارىن كورسەتتى؟ (فوتو)

رەسەي «جەڭىس كۇنىنە» ارنالعان اسكەري پارادتا الىستان باسقارىلاتىن تانكىلەرىن، باسقا دا بىرقاتار جاڭا سوعىس قۇرالدارىن كورسەتىپ، ولاردىڭ سۇرياداعى سوعىستا سىناقتان وتكىزىلگەنىن مالىمدەدى. ايتالىق، ۋران-9 اتتى تانكتەرى زىمىران، زەڭبىرەك جانە پۋلەمەتپەن جابدىقتالعان. كەڭەس وداعىندا قالىپتاسقان اسكەري پارادتا جاڭا سوعىس قۇرالدارىن كورسەتۋ ءداستۇرىن رەسەي پرەزيدەنتى ۆلاديمير پۋتين قايتا قالپىنا كەلتىردى. بۇل BBC نازارىن اۋداردى.

قۋاتتى ارميا رەسەيدىڭ ۇلتتىق نەگىزدەرىنىڭ ءبىرى بولىپ قالىپتاسىپ كەلەدى. دەگەنمەن، BBC-ءدىڭ پىكىرىنە سەنسەك، «قىرعيقاباق سوعىس جىلدارىندا» كەڭەس وداعى بارلىق قاراجاتتاردى اسكەري قۋاتقا جۇمساي بەرىپ، سوڭىندا مەملەكەت بانكروت بولعان دەسەدى. كەڭەس وداعى ىدىراعاننان كەيىن رەسەي ارمياسى داعدارىسقا ۇشىراپ، قورعانىس بيۋدجەتى كۇرت قىسقارىپ كەتكەن. پۋتين بيلىككە كەلگەننەن كەيىن رەسەي ارمياسىن زاماناۋي، قۋاتتى كۇشكە اينالدىردى.

ۋران-9 ءسۇريا جەرىندە مينا تازالاۋ قىزمەتىن اتقاردى. فوتو: MIL.RU/FACEBOOK.

بۇگىن ماسكەۋدەگى پارادتا ۇشقىشسىز ۇشاقتار، كەمەگە قارسى زىمىراندار جانە جاياۋ اسكەرلەرگە ارنالعان كولىكتەر كورسەتىلدى. اسىرەسە، ۋران-9 اتتى تانك رەسەيلىك باسىلىمدار جاعىنان كوبىرەك ماقتالدى. ونىڭ سۇرياداعى سوعىستا جاقسى ناتيجە كورسەتكەنىن جارىسا جازۋدا. اتالعان تانك مينا تازالاۋ وپەراتسياسىنا دا قابىلەتتى ەكەنى ايتىلۋدا. ۋران-9 نىسانانى ءوزى تابا الادى، تەك شابۋىل جاساۋ بۇيرىعى 3 شاقىرىم قاشىقتىقتا ورنالاسقان باس شتاب ارقىلى بەرىلەدى. ول سۇرياداعى دەير ءاز-زور، الەپپو، پالميرا جەرلەرىندەگى سوعىستا مينا تازالاۋ قىزمەتىن اتقارعان. «گازەتا.رۋ» باسىلىمى ۋران-9-دىڭ كومەگىمەن، سۇرياداعى رەسەي كۇشتەرى كوزدەۋلى جەرگە تەز جەتىپ وتىرعانىن جازدى.

ام-1 كولىكتەرى. فوتو: MIL.RU/FACEBOOK.

ماسكەۋدە جۇرتقا كورسەتكەن اسكەري تەحنيكانىڭ ءبىرى، جاياۋ اسكەرلەرگە ارنالعان ام-1 موتوتسيكلى. بۇل كولىكتەرگە ارنايى پۋلەمەت ورناتىلعان، سونداي-اق، جاياۋ اسكەرگە كەرەكتى جابدىقتارى تولىق. اسىرەسە، قارلى دالالار مەن قۇمدى القاپتاردا ءوز ءرولىن ايگىلەيدى.

پارادتا كورسەتىلگەن تاعى ءبىر جاڭا تەحنيكا – «كورسار» درونى. بۇل ۇشقىشسىز ۇشۋ قۇرىلعىسى اۋا-رايىنىڭ قولايسىز كەزىندە دە بارلاۋ جۇمىستارىن اتقارا الادى. ءتىپتى الىس ارالىققا جۇك تاسىمالداۋ قابىلەتى دە بار. سونىمەن بىرگە، «كورسار» درونىن دا زىمىران شابۋىلىن جاسايتىن قابىلەت تە بار. «كورسار» ون ساعات بويى، 6 شاقىرىم بيىكتىكتە ۇشا الادى. الىس ۇشۋ ارالىعى 160 شاقىرىمعا دەيىن جەتەدى. رەسەي قورعانىس مينيسترلىگىنىڭ مالىمەتىنشە رەسەيدە بۇنداي درونداردان بىرنەشەۋى بار.

"كورسار". فوتو: MIL.RU/FACEBOOK.

ماسكەۋ كەڭىستىگىندە تىكۇشاقتار مەن اسكەري ۇشاقتاردا كورىندى. ميگ-31 ۇشاقتارى 3-4 اي بۇرىن الەمگە تانىس بولعان «قانجار» راكەتالارىمەن ۇشىپ وتپەك. ءپۋتيننىڭ مالىمدەمەسىندە، قورعانىس راكەتالارىنان جىلدام ۇشاتىن «قانجار» الەمنىڭ ەشبىر زىمىران قورعانىس جۇيەسىنە ۇستاتپايدى جانە عالامشاردىڭ كەز-كەلگەن نۇكتەسىنە جەتەدى. مامانداردىڭ ايتۋىنشا «قانجار» وسىعان دەيىن رەسەيدىڭ «ەسكەندىر» اتتى زىمىرانىنىڭ جاڭا ۇلگىسى.

پاراد جاڭالىعىنىڭ ەڭ كورنەكتىلەرىنىڭ ءبىرى جاڭادان جاسالعان سۋ-57 (ت-50 دەپ تە اتايدى) سوعىس ۇشاعى. ول وسىعان دەيىن رەسەي اۋە كۇشتەرىندە ەسكىرىپ بارا جاتقان ميگ-29 جانە سۋ-27 ۇشاقتارىنىڭ ورىنىن الماستىرادى دەپ كۇتىلۋدە.

سۋ-57 سوعىس ۇشاعى. فوتو: MIL.RU/FACEBOOK.

ءبىر سوزبەن ايتقاندا رەسەي باتىس ەلدەرىنىڭ ەكونوميكالىق قىسىمى استىندا، ءوزىنىڭ مىعىم اسكەري قۋاتىمەن ازۋ ءتىسىن كورسەتپەك. رەسەيدىڭ الەمگە اسكەري تەحنيكالارىمەن ايبار شەگۋى تەك بۇل عانا ەمەس، بىلتىر وتكەن «باتىس-2017» اسكەري-وقۋ جاتتىعۋىندا دا رەسەي سوعىس قۋاتىن انىق بايقاتقان. الايدا، تاۋەلسىز ساراپشىلاردىڭ پىكىرىنشە، سانكتسيا سوققىسى جەتەر جەرىنە ءالى جەتىپ بولعان جوق. بۇل قۋاتتى ارميانىڭ دا بيۋدجەتتىك داعدارىسى كوپ ۇزاماي بولادى دەگەندى ەسكەرتەدى.

 “The Qazaq Times”