Foto: darakchi.uz

Özbekstan prezidenti qauipsizdik qızmetiniñ jetekşis Abdurahim Muminov qızmetinen alınıp, Tötenşe jağdaylar ministriniñ orınbasarı qızmetine tağayındaldı. Al Taşkent jol qozğalısı qauipsizdigi basqarma basşısı, polkovnik Barat Mamenovqa qılmıstıq is qozğalğan. Bwl turalı Ortalıq Aziya jañalıqtar qızmeti habarladı.

Atı-jönin aytudı jön körmegen özbek şeneunigi joğarıdağı auız-tüyiske jäne qozğalğan qılmıstıq iske 23-24 säuirde Türkimenstan prezidentiniñ kelui qarsañında bolğan jağday sebep boldı deydi. Bwl oqiğa Özbekstan prezidenti Şavkat Mirziyaevtiñ aşuına tigen.

"Prezident Taşkenttegi nısandardıñ birin qarap jürgen. Osı uaqıtta jol inspektordıñ biri däl osı audanmen ötudi şeşken. Prezidenttiñ qauipsizdik qızmetindegi adamdar oğan rwqsat bergen. Biraq tınış, eşqanday şusız ötuin swrağan. Biraq jol inspektorı qattı jıldamdıqpen sirenanı qosıp ötken. Mwnıñ bärin prezident Şavkat Mirziyaev körgen," – deydi Taşkent jol qozğalısı qauipsizdigi basqarmasında isteytin qızmetkerdiñ biri.

Ol Barat Mamenov äskeri abaqtığa bes künge qamalğanın aytadı.

Al Abdurahim Muminov Özbekstan prezidenti qauipsizdik qızmeti basşılığına 2016 jılı kelgen bolatın.

“The Qazaq Times”