Foto: AFP

Armeniyanıñ oppoziciya basşısı Nikol Paşinyandı qoldağan on mıñdağan halıq onıñ  azamattıq bağınbauşılıq tanıtu turalı ündeuin qabıl alıp, ortalıq köşeler men memlekettik mekemelerdiñ aldın bögeu akciyasına qatıstı.  Parlament otırısında Armeniyanıñ Prem'er-ministri bolıp saylanuğa qajetti 53 dauıstıñ tek 45-in jinap, bileuşi Respublikalıq partiyanıñ şeşimin «halıqtı qorlau» dep atağan Nikol Paşinyan eldi jappay qarsılıq bildiruge şaqırğan bolatın. Bwl turalı VVS aqparattıq agenttigi jazdı.

Bügin Erevanda beybit sipattağı halıqtıq qarsılıq esebinen ortalıq köşeler men äuejayğa barar jol jabıldı. Armeniyanıñ Qorğanıs ministrligi halıqtan qauipsizdikti qamtamasız etu maqsatında äskeri tehnikanıñ qozğalısına kedergi jasamaudı swradı. Erevanda metro jabılıp, temir jol qozğalısında qiındıqtar tuındadı. Armeniyanıñ Vanadzor qalasında halıq jergilikti meriyağa kiretin joldardı bögegen.

Nikol Paşinyan Parlamenttegi barlıq oppoziciyalıq frakciyalardıñ qoldauına ie bolğanımen, Prem'er-ministr qızmetine kandidaturası qabıldanuı üşin qajetti bileuşi koaliciya müşeleriniñ dausına qol jetkize almadı. Armeniya Respublikalıq partiyasınıñ müşesi Arman Sagatelyan «Paşinyan mırza, siz jaqsı Parlament müşesisiz, biraq Prem'er-ministr boluğa biliktiligiñiz jetpeydi», - dedi. Öz kezeginde Paşinyan Respublikalıq partiya müşelerine: «Sizderdiñ halıqtıñ toleranttılığın älsizdik dep qabıldaularıñızdıñ soñı ülken dauılğa äkep soğuı mümkin» degen eskertu jasadı. Ädettegi äskeri jeydesin resmi kiim ülgisine auıstırğan oppoziciya köşbasşısı özin qoldauşı halıqtı avtomobil', temir joldarı men äuejayda böget ornatıp, qarsılıq bildiruge şaqırdı. Äl-Jazira aqparattıq agenttigi «Ol osı arqılı Parlamentti özin Prem'er-ministr etip saylauğa mäjbürlegisi keledi» dep jazdı. Degenmen Nikol Paşinyan VVS-ge bergen swhbatında bwl narazılıq akciyaları onıñ Prem'er-ministr boluı üşin emes, halıqtıñ qwqığı qorğaluı maqsatında wyımdastırılıp otırğanın jetkizgen.

Nikol Paşinyan ağımdağı jıldıñ säuir ayında  Armeniyanıñ bwrınğı Prezidenti Serj Sargsyannıñ qızmetin arı qaray Parlamenttik basqaru jüyesine jañadan ötken eldiñ Prem'er-ministri esebinde jalğastıruına qarsı köterilisterdiñ basşısı boldı. Armeniya zertteuler institutınıñ ökili Syuzanna Petrosyan Konstituciya boyınşa Parlament 7 kün işinde jaña Prem'er-ministrdi tañday alatının aytadı.

Reseylik  TASS Nikol Paşinyannıñ Prem'er-ministr qızmetine qayta ümitker bolıp qatısatının habarladı. Aqparattıq agenttik oppoziciya basşısınıñ resmi ökili Tigran Avinyanğa silteme jasap, Nikol Paşinyannıñ 8 mamırda ötetin Parlament otırısında bwrınğı bağdarlamasın tağı tanıstıratının jetkizgen. Avinyannıñ aytuınşa, Armeniya Respublikalıq partiyasınıñ Paşinyannıñ bağdarlamasına tüzetuler engizuin talap etkenine qaramastan, oppoziciya basşısı öz bağdarlamasın özgerissiz qaldıruğa nietti. Bwl turalı Nikol Paşinyan «Biz tek halıqtıñ talaptarın ğana eskeremiz. Talap ete alatın jalğız zañdı bilik - halıq» degen mälimdeme jasağan.