فوتو: AFP

ارمەنيانىڭ وپپوزيتسيا باسشىسى نيكول پاشينياندى قولداعان ون مىڭداعان حالىق ونىڭ  ازاماتتىق باعىنباۋشىلىق تانىتۋ تۋرالى ۇندەۋىن قابىل الىپ، ورتالىق كوشەلەر مەن مەملەكەتتىك مەكەمەلەردىڭ الدىن بوگەۋ اكتسياسىنا قاتىستى.  پارلامەنت وتىرىسىندا ارمەنيانىڭ پرەمەر-ءمينيسترى بولىپ سايلانۋعا قاجەتتى 53 داۋىستىڭ تەك 45-ءىن جيناپ، بيلەۋشى رەسپۋبليكالىق پارتيانىڭ شەشىمىن «حالىقتى قورلاۋ» دەپ اتاعان نيكول پاشينيان ەلدى جاپپاي قارسىلىق بىلدىرۋگە شاقىرعان بولاتىن. بۇل تۋرالى ۆۆس اقپاراتتىق اگەنتتىگى جازدى.

بۇگىن ەرەۆاندا بەيبىت سيپاتتاعى حالىقتىق قارسىلىق ەسەبىنەن ورتالىق كوشەلەر مەن اۋەجايعا بارار جول جابىلدى. ارمەنيانىڭ قورعانىس مينيسترلىگى حالىقتان قاۋىپسىزدىكتى قامتاماسىز ەتۋ ماقساتىندا اسكەري تەحنيكانىڭ قوزعالىسىنا كەدەرگى جاساماۋدى سۇرادى. ەرەۆاندا مەترو جابىلىپ، تەمىر جول قوزعالىسىندا قيىندىقتار تۋىندادى. ارمەنيانىڭ ۆانادزور قالاسىندا حالىق جەرگىلىكتى مەرياعا كىرەتىن جولداردى بوگەگەن.

نيكول پاشينيان پارلامەنتتەگى بارلىق وپپوزيتسيالىق فراكتسيالاردىڭ قولداۋىنا يە بولعانىمەن، پرەمەر-مينيستر قىزمەتىنە كانديداتۋراسى قابىلدانۋى ءۇشىن قاجەتتى بيلەۋشى كواليتسيا مۇشەلەرىنىڭ داۋسىنا قول جەتكىزە المادى. ارمەنيا رەسپۋبليكالىق پارتياسىنىڭ مۇشەسى ارمان ساگاتەليان «پاشينيان مىرزا، ءسىز جاقسى پارلامەنت مۇشەسىسىز، بىراق پرەمەر-مينيستر بولۋعا بىلىكتىلىگىڭىز جەتپەيدى»، - دەدى. ءوز كەزەگىندە پاشينيان رەسپۋبليكالىق پارتيا مۇشەلەرىنە: «سىزدەردىڭ حالىقتىڭ تولەرانتتىلىعىن السىزدىك دەپ قابىلداۋلارىڭىزدىڭ سوڭى ۇلكەن داۋىلعا اكەپ سوعۋى مۇمكىن» دەگەن ەسكەرتۋ جاسادى. ادەتتەگى اسكەري جەيدەسىن رەسمي كيىم ۇلگىسىنە اۋىستىرعان وپپوزيتسيا كوشباسشىسى ءوزىن قولداۋشى حالىقتى اۆتوموبيل، تەمىر جولدارى مەن اۋەجايدا بوگەت ورناتىپ، قارسىلىق بىلدىرۋگە شاقىردى. ءال-جازيرا اقپاراتتىق اگەنتتىگى «ول وسى ارقىلى پارلامەنتتى ءوزىن پرەمەر-مينيستر ەتىپ سايلاۋعا ماجبۇرلەگىسى كەلەدى» دەپ جازدى. دەگەنمەن نيكول پاشينيان ۆۆس-گە بەرگەن سۇحباتىندا بۇل نارازىلىق اكتسيالارى ونىڭ پرەمەر-مينيستر بولۋى ءۇشىن ەمەس، حالىقتىڭ قۇقىعى قورعالۋى ماقساتىندا ۇيىمداستىرىلىپ وتىرعانىن جەتكىزگەن.

نيكول پاشينيان اعىمداعى جىلدىڭ ءساۋىر ايىندا  ارمەنيانىڭ بۇرىنعى پرەزيدەنتى سەرج سارگسياننىڭ قىزمەتىن ارى قاراي پارلامەنتتىك باسقارۋ جۇيەسىنە جاڭادان وتكەن ەلدىڭ پرەمەر-ءمينيسترى ەسەبىندە جالعاستىرۋىنا قارسى كوتەرىلىستەردىڭ باسشىسى بولدى. ارمەنيا زەرتتەۋلەر ينستيتۋتىنىڭ وكىلى سيۋزاننا پەتروسيان كونستيتۋتسيا بويىنشا پارلامەنت 7 كۇن ىشىندە جاڭا پرەمەر-ءمينيستردى تاڭداي الاتىنىن ايتادى.

رەسەيلىك  تاسس نيكول پاشينياننىڭ پرەمەر-مينيستر قىزمەتىنە قايتا ۇمىتكەر بولىپ قاتىساتىنىن حابارلادى. اقپاراتتىق اگەنتتىك وپپوزيتسيا باسشىسىنىڭ رەسمي وكىلى تيگران اۆينيانعا سىلتەمە جاساپ، نيكول پاشينياننىڭ 8 مامىردا وتەتىن پارلامەنت وتىرىسىندا بۇرىنعى باعدارلاماسىن تاعى تانىستىراتىنىن جەتكىزگەن. اۆينياننىڭ ايتۋىنشا، ارمەنيا رەسپۋبليكالىق پارتياسىنىڭ پاشينياننىڭ باعدارلاماسىنا تۇزەتۋلەر ەنگىزۋىن تالاپ ەتكەنىنە قاراماستان، وپپوزيتسيا باسشىسى ءوز باعدارلاماسىن وزگەرىسسىز قالدىرۋعا نيەتتى. بۇل تۋرالى نيكول پاشينيان «ءبىز تەك حالىقتىڭ تالاپتارىن عانا ەسكەرەمىز. تالاپ ەتە الاتىن جالعىز زاڭدى بيلىك - حالىق» دەگەن مالىمدەمە جاساعان.