Foto: ww.internethaber.com

Bryussel'de Şıñjañdağı qısımğa wşırağan mwsılmandardıñ müddesin qorğauğa bağıttalğan bwqaralıq şeru ötti. Eki mıñğa juıq adam Europarlament ğimaratınıñ aldına jinaldı. Bwl turalı «internethaber.com» saytı habarlaydı.

Şeruge qatısuşılar Qıtaydağı eş negizsiz qamalğan mwsılmandardıñ bosatıluın, sol jerde ömir süretin mwsılman halıqtarınıñ tili men dinine, mädenietine qwrmet körsetiluin talap etti. Sonday-aq, şeru wyımdastıruşıları Euroodaqtan Şıñjañdağı osı keleñsizdikke qatıstı tekseru jürgizu üşin sol aymaqqa arnayı top jiberuin swradı.

Qıtaydağı mwsılmandar degende, onıñ işinde özimizdiñ de qaraköz qandastarımız bar. Bwl mäsele — qazaq qoğamınıñ bügingi tañdağı eñ bastı dertine aynaluda. Arğı bettegi ağayın jazıqsız türmege jabılıp, qısastıq körip jatqanda qazaq qalay tınış wyıqtasın?! Endeşe, Qıtaydağı qısım körip jatqan qauım üşin Euroodaqtıñ esigin qağıp kömek swralıp jatır dep, qol qusırıp otıruğa bolmaydı. Bwğan qatıstı Qazaqstan biliginiñ, QR SİM-niñ naqtı qadam jasaytın kezi keldi.

“The Qazaq Times”