قىتايداعى قىسىم كورگەن مۇسىلماندار ەۋروداقتان كومەك سۇراۋدا

بريۋسسەلدە شىڭجاڭداعى قىسىمعا ۇشىراعان مۇسىلمانداردىڭ مۇددەسىن قورعاۋعا باعىتتالعان بۇقارالىق شەرۋ ءوتتى. ەكى مىڭعا جۋىق ادام ەۋروپارلامەنت عيماراتىنىڭ الدىنا جينالدى. بۇل تۋرالى «internethaber.com» سايتى حابارلايدى.

شەرۋگە قاتىسۋشىلار قىتايداعى ەش نەگىزسىز قامالعان مۇسىلمانداردىڭ بوساتىلۋىن، سول جەردە ءومىر سۇرەتىن مۇسىلمان حالىقتارىنىڭ ءتىلى مەن دىنىنە، مادەنيەتىنە قۇرمەت كورسەتىلۋىن تالاپ ەتتى. سونداي-اق، شەرۋ ۇيىمداستىرۋشىلارى ەۋرووداقتان شىڭجاڭداعى وسى كەلەڭسىزدىككە قاتىستى تەكسەرۋ جۇرگىزۋ ءۇشىن سول ايماققا ارنايى توپ جىبەرۋىن سۇرادى.

قىتايداعى مۇسىلماندار دەگەندە، ونىڭ ىشىندە ءوزىمىزدىڭ دە قاراكوز قانداستارىمىز بار. بۇل ماسەلە — قازاق قوعامىنىڭ بۇگىنگى تاڭداعى ەڭ باستى دەرتىنە اينالۋدا. ارعى بەتتەگى اعايىن جازىقسىز تۇرمەگە جابىلىپ، قىساستىق كورىپ جاتقاندا قازاق قالاي تىنىش ۇيىقتاسىن؟! ەندەشە، قىتايداعى قىسىم كورىپ جاتقان قاۋىم ءۇشىن ەۋرووداقتىڭ ەسىگىن قاعىپ كومەك سۇرالىپ جاتىر دەپ، قول قۋسىرىپ وتىرۋعا بولمايدى. بۇعان قاتىستى قازاقستان بيلىگىنىڭ، قر ءسىم-ءنىڭ ناقتى قادام جاسايتىن كەزى كەلدى.

“The Qazaq Times”