Foto: ria.ru

Qıtaydağı mwsılmandar qajılıq saparğa attanbas bwrın kommunisttik partiyanıñ aldında ant beruge mindetteldi.  Bwl turalı Business Insider aqparattıq saytı habarladı. 

Atalğan aqparat köziniñ habarlauınşa, Şıñjañ aymağınıñ twrğındarı qajılıq parızdarın öteuge barmay twrıp jas mölşerleri men jwmıs orındarın,  materialdıq jağdayların körsetip, arnayı saytqa tirkeluleri tiis. Dini parızdan ötemek bolğan mwsılmandarğa bwdan özge de talaptar küşeytilgen. Aytalıq, qajılıqqa baruşılardıñ jası 50-70 jas aralığın qamtu kerek äri  Ürimjiniñ kem degende 5 jıl twraqtı twrğını boluları tiis. "Osınday talaptarğa säykes keletin mwsılmandar ğana Qıtay kommunistik partiyasına şınayı berilgendikterin rastap, internet arqılı saualnama toltıra aladı", dep habarlaydı Business Insider aqparattıq saytı.

Ayta ketu kerek, Qıtay biligi jıl sayın qajılıqqa baratın mwsılmandarğa qatıstı monitoring jürgizip keledi eken.  Human Rights Watch (H'yuman Rayts Votç) halıqaralıq qwqıq qorğau wyımınıñ pikirinşe, qıtaylıq bilik qwrılımdarı mwsılmandardıñ qajılıq saparına «sayasi diversiyalıq äreketterin jasıru» maqsatında ğana jol berip keledi dep esepteydi.

Şınjañnıñ qazirgi sayasi jağdayı tım kürdeli. Ondağı din men etnikalıq azşılıq qauımğa jasalıp jatqan qısımdar turalı älem aqparat keñistigi habardar. Joğarıdağıday wlttardıñ dini senim qwqığın bwzu äreketteri bir ğana wyğır nemese düngenderge ğana emes, ondağı qazaq qandastarımızğa da bağıttaluda. Adamdardıñ bostandığı men qwqığın qorğau tanımı joğarılağan qazirgi zamanda, Qıtay biliginiñ bwl qadamdarı älem elderiniñ alañdauşılığın tudırıp otır.

“The Qazaq Times”