Foto: worldbulletin.net

"BBS", "Reyter" siyaqtı halıqaralıq köptegen iri aqparat qwraldarı Özbekstanda orın alıp jatqan özgerister turalı jarısa habar taratuda.

Özbekstannıñ bwrınğı prezidenti marqwm Islam Karimov qaytıs bolğannan keyin onıñ ornına kelgen Şevkat Mirziyaevtıñ reformaşıl äreketteri soñğı uaqıtta älem baspasözderiniñ nazarınan tüspey twr. Prezident Mirziyaevtıñ eldiñ "jabıq sayasi wstanımın" özgertui Özbekstanğa qatıstı qalıptasqan pikirlerdi de özgertude. Mäselen, "The New York Times" basılımında Endryu Higginstiñ qalamınan şıqqan "Avtoritarizm taralıp jatqanda Özbekstanda bäri kerisinşe" degen maqalada Özbekstanda jürgizilgen reformalarğa basa nazar audarılğan. Maqalada avtor äsirese I.Karimov  bilik etken uaqıttıñ el tarihında qanşalıqtı qatañ kezeñ bolıp qalğanın da eske salıp, Mirziyaev kezinde osı jağdaydıñ jaqsı jağına qaray özgergeni turalı jazğan. Üstinen köptegen arız-şağım tüsken Özbekstan Wlttıq Qauipsizdik Qızmetiniñ joyıluı, özbek otandastarınıñ qaytadan orala bastauı, köptegen jurnalist pen sayasi twtqındarğa rahımşılıq jasaluı jäne maqta şaruaşılığınıñ joyıluı siyaqtı özgerister de nazardan tıs qalmağan. Maqalanıñ soñında bilik basında äli de bwrınğı qızmetkerlerdiñ köp ekeni aytılıp, köp närseniñ äli de bolsa bwrınğışa ekeni jazılğan.

Al, "BBC"-de "Özbekstan şınımen de älemge esigin aştı ma?" degen taqırıptağı maqala oqırmandarına jol tarttı. Maqalada 2005 jılğı Ändijan oqiğalarınan keyin elden ketuine ükim şığarılğan "BBC"-diñ özbek qızmetiniñ qaytadan jwmıs istey bastağanı aytılğan. Sonımen qatar, az ğana uaqıttıñ işinde jürgizilgen reformalardıñ kesirinen şielenisken jağdayğa qaramastan, el azamattarınıñ köbisiniñ Mirziyaev biligin "wnatıp qalğanı" jazılğan.

"Reyter" aqparattıq agenttiginde Özbekstannıñ «Human Rights Watch» halıqaralıq adam qwqığın qorğau wyımımen qayta jwmıs istey bastağanı, atalğan wyım tarapınan jariyalanğan Özbekstannıñ söz bostandığı turalı aytılğan. Sonımen qatar "NY Review of Books" aqparattıq saytı da "Özbekstanda jaña kezeñ bastaldı ma?" degen taqırıppen, öz-ağañdarda orın alğan özgeristerge toqtalğan.

Foto: worldbulletin.net

Jalpı, Özbekstandı Mirziyaev basqarmay twrıp, älem halıqtarı ol elge "jabıq memleket" retinde bağa beretin. Sebebi, Karimov kezinde özbekterdiñ qanday da bir äskeri-sayasi odaqtarğa müşelikke nietsiz wstanımı, jalpı oqşau sayasatı basqa elder üşin jwmbaqqa tolı edi. Al 2016 jıldan bastap Özbekstandı basqarıp kele jatqan Mirziyaevtıñ sol wstanımdı özgertip, basqaşa sayasat jürgizgeni belgili.

“The Qazaq Times”