Beybit ömirge bülik äkelip, qanşama adamnıñ jastıq şağın, asqaq armanın, er jetip twrğan balaları men asıl jarların, tulağan qızuı men balausa ajarın alğan swm soğıs eşbir jannıñ jadınan öşpek emes. Jalındağan jastardıñ armandarı ayaqqa taptalıp, qauızın aşpastan qırşınınan qiıldı. Qarapayım halıqqa qandı qasiret äkelip, qarğıs arqalağan swm soğıs qanşama qalamgerdiñ qalam terbeuine arqau boldı. Sonıñ biri älemge ortaq zañğar jazuşı Şıñğıs Aytmatovtıñ «Qws jolı» povesiniñ jelisimen  «Ana – Jer Ana» tragediyası qatparlı paraqtardan kieli sahnağa quırşaqtar arqılı jol tarttı. Quırşaqqa jan bitiretin artistiñ onımen qatar twrıp birge röl oynauı teatr önerindegi tıñ serpilis bolıp otır.  Atalmış tuındı Dina Jwmabaevanıñ rejisserligimen 27 aqpannan bastap Memlekettik quırşaq teatrında körermen nazarına wsınıldı.

Qoyılımdağı ana Tolğanay men otbasılıq ömirge endi ğana ayaq basqan Äliman – qilı kezeñdegi bükil eldiñ ahualın, qara halıqtıñ kün körisin, joqşılıqpen küresin, soğısqa attanğan jaqındarına degen qimastıqqa tolı sağınışın sahnaladı. Erleri qarşa borağan bombanıñ astında ömir men ölim arasında arpalısıp jürgende, jarlarınıñ näzik jüregi tasqa aynalıp, janarları jastan qwrğamay, tılda jürip qara jwmıstan qol üzbegen äyelder beynesin köre aldıq. Jeñis dabılı qağılsa da, jürek aptıqtarı basılmay, qırşın ketken bozdaqtardıñ joqtığına senbey, qayta keler dep ümit qılğan artisterdiñ akterlik şeberligi körermenderdi ilandıra aldı.

Atalmış tuındıdağı älsin-älsin jarınıñ janarına elestegen Swbanqwldıñ, Otan qorğau jolında öz anasınan jıraqtap, Jer ananı jastanğan Qasım, Maysalbek pen Jaynaqtıñ beyneleri quırşaqqa jan bitirgendey äser qaldıradı.

Qoyılımnıñ alğaşqı küni teatrımızğa dramaturg Dulat Isabekov, jazuşı, dramaturg Swltanäli Balğabaev, akter, teatr rejisseri, Qazaq KSR xalıq artisi Esmwxan Obaev, teatrtanuşı Säniya Qabdieva, Amangeldi Mwqan, Baqıt Nwrpeyis, Ayjan Ahmet jäne t.b. qwmetti qauım men äriptesterimiz arnayı at basın bwrıp, pikirlerin bildirip, qadirli körermenderimizdiñ qatarınan tabıldı.

Solardıñ işinde belgili aktrisa, Künswlu Twrğınbekqızı:

«Meyirimge şöldegen mına qatigez qoğamda ömir sürip jatqan adamdardı quırşaq teatrına kelip tazaruğa şaqırar edim.Bügingi qoyılımnan boyıma bir qazına jinağanday äser alıp şıqtım. Osı rette körermendi şınayı şeberlikterimen ilandırğan äriptesterime rizaşılığımdı bildirgim keledi. Olardıñ boyınan öner ieleriniñ köbinde bolatın baqtalastıqtı bayqamadım. Bir-birin demep, qoldau körsetip, jwmıla jwmıs jasağandarınıñ arqasında osınday sapalı dünie jasadı dep bilemin. Dauıs ırğaqtarı men söz saptauları, tipti üş aktrisanıñ alma-kezek bir röldi birinen-biri ilip äketip, qatar somdap şığuı – äjemniñ tekemetti tiyanaqtı etip tergenindey äser qaldırdı. Alla näsip etip, düniege perzentim kelip jatsa, onıñ bas swğıp, alğaş aşatın esigi – osı quırşaq teatrı boladı» dep ağınan jarıldı.

Atalmış qoyılım - birinşiden, jazuşı Ş.iAytmatovtıñ 90 jıldığına tartu desek, ekinşiden Wlı Otan soğısında jan keşken ata-babalarımızdıñ ruhına arnaladı. Sonday-aq, «Ana – Jer Ana» spektakli teatrdıñ twraqtı repertuarınıñ qorjınına qosıldı. Osı orayda, Memlekettik quırşaq teatrı köpşiliktiñ köñilinen şığıp, jürek qılın qozğağan, soğıs taqırıbındağı tırnaq aldı tuındını tamaşalauğa barşa teatr süyer qauımdı şaqıradı.

Ayjan Esengeldi

“The Qazaq Times”