بەيبىت ومىرگە بۇلىك اكەلىپ، قانشاما ادامنىڭ جاستىق شاعىن، اسقاق ارمانىن، ەر جەتىپ تۇرعان بالالارى مەن اسىل جارلارىن، تۋلاعان قىزۋى مەن بالاۋسا اجارىن العان سۇم سوعىس ەشبىر جاننىڭ جادىنان وشپەك ەمەس. جالىنداعان جاستاردىڭ ارماندارى اياققا تاپتالىپ، قاۋىزىن اشپاستان قىرشىنىنان قيىلدى. قاراپايىم حالىققا قاندى قاسىرەت اكەلىپ، قارعىس ارقالاعان سۇم سوعىس قانشاما قالامگەردىڭ قالام تەربەۋىنە ارقاۋ بولدى. سونىڭ ءبىرى الەمگە ورتاق زاڭعار جازۋشى شىڭعىس ايتماتوۆتىڭ «قۇس جولى» پوۆەسىنىڭ جەلىسىمەن  «انا – جەر انا» تراگەدياسى قاتپارلى پاراقتاردان كيەلى ساحناعا قۋىرشاقتار ارقىلى جول تارتتى. قۋىرشاققا جان بىتىرەتىن ءارتيستىڭ ونىمەن قاتار تۇرىپ بىرگە ءرول ويناۋى تەاتر ونەرىندەگى تىڭ سەرپىلىس بولىپ وتىر.  اتالمىش تۋىندى دينا جۇماباەۆانىڭ رەجيسسەرلىگىمەن 27 اقپاننان باستاپ مەملەكەتتىك قۋىرشاق تەاترىندا كورەرمەن نازارىنا ۇسىنىلدى.

قويىلىمداعى انا تولعاناي مەن وتباسىلىق ومىرگە ەندى عانا اياق باسقان ءاليمان – قيلى كەزەڭدەگى بۇكىل ەلدىڭ احۋالىن، قارا حالىقتىڭ كۇن كورىسىن، جوقشىلىقپەن كۇرەسىن، سوعىسقا اتتانعان جاقىندارىنا دەگەن قيماستىققا تولى ساعىنىشىن ساحنالادى. ەرلەرى قارشا بوراعان بومبانىڭ استىندا ءومىر مەن ءولىم اراسىندا ارپالىسىپ جۇرگەندە، جارلارىنىڭ نازىك جۇرەگى تاسقا اينالىپ، جانارلارى جاستان قۇرعاماي، تىلدا ءجۇرىپ قارا جۇمىستان قول ۇزبەگەن ايەلدەر بەينەسىن كورە الدىق. جەڭىس دابىلى قاعىلسا دا، جۇرەك اپتىقتارى باسىلماي، قىرشىن كەتكەن بوزداقتاردىڭ جوقتىعىنا سەنبەي، قايتا كەلەر دەپ ءۇمىت قىلعان ارتيستەردىڭ اكتەرلىك شەبەرلىگى كورەرمەندەردى يلاندىرا الدى.

اتالمىش تۋىندىداعى ءالسىن-ءالسىن جارىنىڭ جانارىنا ەلەستەگەن سۇبانقۇلدىڭ، وتان قورعاۋ جولىندا ءوز اناسىنان جىراقتاپ، جەر انانى جاستانعان قاسىم، مايسالبەك پەن جايناقتىڭ بەينەلەرى قۋىرشاققا جان بىتىرگەندەي اسەر قالدىرادى.

قويىلىمنىڭ العاشقى كۇنى تەاترىمىزعا دراماتۋرگ دۋلات يسابەكوۆ، جازۋشى، دراماتۋرگ ءسۇلتانالى بالعاباەۆ، اكتەر، تەاتر رەجيسسەرى، قازاق كسر xالىق ءارتيسى ەسمۇxان وباەۆ، تەاترتانۋشى ءسانيا قابديەۆا، امانگەلدى مۇقان، باقىت نۇرپەيىس، ايجان احمەت جانە ت.ب. قۇمەتتى قاۋىم مەن ارىپتەستەرىمىز ارنايى ات باسىن بۇرىپ، پىكىرلەرىن ءبىلدىرىپ، قادىرلى كورەرمەندەرىمىزدىڭ قاتارىنان تابىلدى.

سولاردىڭ ىشىندە بەلگىلى اكتريسا، كۇنسۇلۋ تۇرعىنبەكقىزى:

«مەيىرىمگە شولدەگەن مىنا قاتىگەز قوعامدا ءومىر ءسۇرىپ جاتقان ادامداردى قۋىرشاق تەاترىنا كەلىپ تازارۋعا شاقىرار ەدىم.بۇگىنگى قويىلىمنان بويىما ءبىر قازىنا جيناعانداي اسەر الىپ شىقتىم. وسى رەتتە كورەرمەندى شىنايى شەبەرلىكتەرىمەن يلاندىرعان ارىپتەستەرىمە ريزاشىلىعىمدى بىلدىرگىم كەلەدى. ولاردىڭ بويىنان ونەر يەلەرىنىڭ كوبىندە بولاتىن باقتالاستىقتى بايقامادىم. ءبىر-ءبىرىن دەمەپ، قولداۋ كورسەتىپ، جۇمىلا جۇمىس جاساعاندارىنىڭ ارقاسىندا وسىنداي ساپالى دۇنيە جاسادى دەپ بىلەمىن. داۋىس ىرعاقتارى مەن ءسوز ساپتاۋلارى، ءتىپتى ءۇش اكتريسانىڭ الما-كەزەك ءبىر ءرولدى بىرىنەن-ءبىرى ءىلىپ اكەتىپ، قاتار سومداپ شىعۋى – اجەمنىڭ تەكەمەتتى تياناقتى ەتىپ تەرگەنىندەي اسەر قالدىردى. اللا ءناسىپ ەتىپ، دۇنيەگە پەرزەنتىم كەلىپ جاتسا، ونىڭ باس سۇعىپ، العاش اشاتىن ەسىگى – وسى قۋىرشاق تەاترى بولادى» دەپ اعىنان جارىلدى.

اتالمىش قويىلىم - بىرىنشىدەن، جازۋشى ش.يايتماتوۆتىڭ 90 جىلدىعىنا تارتۋ دەسەك، ەكىنشىدەن ۇلى وتان سوعىسىندا جان كەشكەن اتا-بابالارىمىزدىڭ رۋحىنا ارنالادى. سونداي-اق، «انا – جەر انا» سپەكتاكلى تەاتردىڭ تۇراقتى رەپەرتۋارىنىڭ قورجىنىنا قوسىلدى. وسى ورايدا، مەملەكەتتىك قۋىرشاق تەاترى كوپشىلىكتىڭ كوڭىلىنەن شىعىپ، جۇرەك قىلىن قوزعاعان، سوعىس تاقىرىبىنداعى تىرناق الدى تۋىندىنى تاماشالاۋعا بارشا تەاتر سۇيەر قاۋىمدى شاقىرادى.

ايجان ەسەنگەلدى

“The Qazaq Times”