Torğay ekeş torğay da, balapanın qorğaydı. Foto: Fort Russ.

BWW bas hatşısınıñ resmi ökili Stefan Dujarik Şığıs Guta jäne jalpı Süriyadağı jağday turalı mälimdeme jasadı. Ol Qauipsizdik keñesiniñ qararınan keyin de, soñğı 48 sağattan beri Şığıs Gutadağı atıstıñ toqtamağanın, äyeldermen balalardı qamtığan 30 adam qaza bolğanın mälimdedi. Dujariktiñ aytuınşa, 19 aqpannan beri keminde 500 adam qaza tauıp, 1500 adam jaraqat alğan. Damaskiniñ özinde şabuıldardan 14 adam köz jwmıp, 214 jazıqsız bwqara zardap şekken. Bwl turalı «Şinlañ» aqparattıq saytı habarladı.

BWW ökili Süriyadağı qaysı toptardıñ terrorlıq top ekenin jäne gumanitarlıq kömek üşin naqtı qaysı aymaqtarda atıstı toqtatu bitiminiñ jüzege asıp jatqanın aytıp beru qiın dedi. Dujarik sözinde: «Biz Süriyadağı zardap şekken jazıqsız bwqaralarğa gumanitarlıq kömek jetkizu üşin barlıq taraptıñ atıstı toqtatuın ümit etemiz», – dedi.

Mäskeu tarabı Süriyadağı reseylik qarulı küşterge är küni 5 sağat gumanitarlıq üzilis beretinin mälimdegen. Reseydiñ Qorğanıs ministri Sergey Şoygu mälimdemesinde, prezident Putinniñ bwyrığımen är küni 09:00 den 14:00 aralığında jay bwqaralardıñ aymaqtan şığıp ketuine jäne gumanitarlıq kömekterdi qabıldauına mümkindik beretinderin ayttı.

Reseydiñ bwl şeşimi turalı BWW ökili Dujarik: «5 sağattıq üzilis, bwl joqtan köri jaqsı. Biraq BWW Qauipsizdik keñesiniñ 30 kündik atıstı toqtatu qararınıñ orındalğanın körgimiz keledi», – dedi.

Şığıs gutalıq jay bwqara qazirgi kezde gumanitarlıq kömekke zäru. Äue şabuıldarınan 24 auruhana nemese medicinalıq ortalıqtar zardap şekken. Şabuıldan zardap şekken jandarğa tolıq kömek körsetu mümkin emes.

Süriyanıñ qazirgi jağdayına alañdauşılıq bildirgen Europa parlamenti «Astana procesiniñ kepilgeri bolğan Resey, Iran jäne Türkiyanıñ bwl jerde erekşe jauapkerşiligi bar», – dep otır.

“The Qazaq Times”