بۇۇ باس حاتشىسىنىڭ رەسمي وكىلى ستەفان دۋجاريك شىعىس گۋتا جانە جالپى سۇرياداعى جاعداي تۋرالى مالىمدەمە جاسادى. ول قاۋىپسىزدىك كەڭەسىنىڭ قارارىنان كەيىن دە، سوڭعى 48 ساعاتتان بەرى شىعىس گۋتاداعى اتىستىڭ توقتاماعانىن، ايەلدەرمەن بالالاردى قامتىعان 30 ادام قازا بولعانىن مالىمدەدى. دۋجاريكتىڭ ايتۋىنشا، 19 اقپاننان بەرى كەمىندە 500 ادام قازا تاۋىپ، 1500 ادام جاراقات العان. داماسكىنىڭ وزىندە شابۋىلداردان 14 ادام كوز جۇمىپ، 214 جازىقسىز بۇقارا زارداپ شەككەن. بۇل تۋرالى «شينلاڭ» اقپاراتتىق سايتى حابارلادى.

بۇۇ وكىلى سۇرياداعى قايسى توپتاردىڭ تەررورلىق توپ ەكەنىن جانە گۋمانيتارلىق كومەك ءۇشىن ناقتى قايسى ايماقتاردا اتىستى توقتاتۋ ءبىتىمىنىڭ جۇزەگە اسىپ جاتقانىن ايتىپ بەرۋ قيىن دەدى. دۋجاريك سوزىندە: «ءبىز سۇرياداعى زارداپ شەككەن جازىقسىز بۇقارالارعا گۋمانيتارلىق كومەك جەتكىزۋ ءۇشىن بارلىق تاراپتىڭ اتىستى توقتاتۋىن ءۇمىت ەتەمىز»، – دەدى.

ماسكەۋ تارابى سۇرياداعى رەسەيلىك قارۋلى كۇشتەرگە ءار كۇنى 5 ساعات گۋمانيتارلىق ءۇزىلىس بەرەتىنىن مالىمدەگەن. رەسەيدىڭ قورعانىس ءمينيسترى سەرگەي شويگۋ مالىمدەمەسىندە، پرەزيدەنت ءپۋتيننىڭ بۇيرىعىمەن ءار كۇنى 09:00 دەن 14:00 ارالىعىندا جاي بۇقارالاردىڭ ايماقتان شىعىپ كەتۋىنە جانە گۋمانيتارلىق كومەكتەردى قابىلداۋىنا مۇمكىندىك بەرەتىندەرىن ايتتى.

رەسەيدىڭ بۇل شەشىمى تۋرالى بۇۇ وكىلى دۋجاريك: «5 ساعاتتىق ءۇزىلىس، بۇل جوقتان كورى جاقسى. بىراق بۇۇ قاۋىپسىزدىك كەڭەسىنىڭ 30 كۇندىك اتىستى توقتاتۋ قارارىنىڭ ورىندالعانىن كورگىمىز كەلەدى»، – دەدى.

شىعىس گۋتالىق جاي بۇقارا قازىرگى كەزدە گۋمانيتارلىق كومەككە ءزارۋ. اۋە شابۋىلدارىنان 24 اۋرۋحانا نەمەسە مەديتسينالىق ورتالىقتار زارداپ شەككەن. شابۋىلدان زارداپ شەككەن جاندارعا تولىق كومەك كورسەتۋ مۇمكىن ەمەس.

ءسۇريانىڭ قازىرگى جاعدايىنا الاڭداۋشىلىق بىلدىرگەن ەۋروپا پارلامەنتى «استانا پروتسەسىنىڭ كەپىلگەرى بولعان رەسەي، يران جانە تۇركيانىڭ بۇل جەردە ەرەكشە جاۋاپكەرشىلىگى بار»، – دەپ وتىر.

“The Qazaq Times”