Foto: AFP

Qazaqstan ötken ayda Resey biligi "terroristik qauımdastıqqa qatıstı" dep ayıptağan antifaşistik qozğalıstıñ azamattıq belsendisi Viktor Filinkovtıñ azamattığın rastadı.

Reseydegi Qazaqstan elşiliginiñ 13 aqpanda habarlauınşa, 1994 jılı tuğan Qazaqstan azamatı Viktor Filinkov 25 qañtarda wstalğan, qazir Peterburg abaqtısında otır.

"Bas konsuldıq Reseydiñ sırtqı ister ministrliginiñ Sankt-Peterburgtegi ökildigine jäne Reseydiñ qwzıretti organdarına jüginip, Qazaqstan konsulın qazaqstandıq azamat Viktor Filinkovpen kezdestiruge qolğabıs etuin, oğan konsuldıq-qwqıqtıq kömek körsetuge rwqsat beruin swrağan. Qazirgi uaqıtqa deyin Resey biliginen jauap kelgen joq. Jwmıs jürip jatır", — delingen baspasöz qızmetiniñ habarlamasında.

Aqparat qwraldarınıñ Filinkovtıñ äyeline silteme jasap habarlauınşa, ol 23 aqpanda keşke "Pulkovo" äuejayına bara jatqan jolda joğalğan. Filinkov Kievke wşuı kerek bolğan.

Türmege tekseruge kelgen Qoğamdıq baqılau komissiyasınıñ müşelerine Filinkov özin äuejayda wstağannan keyin azaptağanın aytqan. Komissiya qwjattarına qarağanda, Filinkovtıñ denesinde elektroşokermen küydirgen köptegen izder qalğan. Küdiktiniñ aytuınşa, Federaldıq qauipsizdik qızmetiniñ adamdarı men betine maska kigender onı ormanğa alıp barğan. Filinkovtıñ aytuınşa, onı moyındau mälimdemesin alu üşin azaptağan.

Sankt-Peterburgtegi sot 25 qañtarda küdikti Filinkovtı eki ay qamauda wstau şeşimin şığardı. Tergeu nwsqası boyınşa, Filinkov pen "belgisiz bireuler" "terroristik qızmet, nasihat, sonday-aq terrorizmdi jaqtau jäne oğan qoldau körsetu" maqsatında top qwrğan.

“The Qazaq Times”