Tramp qarulı küşter arasında. Foto: Naples Herald.

AQŞ basılımdarınıñ habarlauınşa, ötken jılı Parijde ötken äskeri paradtan Qwrama Ştat prezidenti Donal'd Tramp qattı äserlengen. Osığan deyin Uaşingtonda äskeri parad qanday da bir äskeri janjaldardıñ ayaqtaluına oray ötkizilip keledi. Aldağı uaqıtta prezident Tramp qarulı küşterge qwrmet retinde äskeri parad ötkizudi oylap otır. Bwl turalı Washington Post basılımı alğaş ret jazdı. Keyin WSJ jäne BBC-diñ resmi saytı habarladı.

AQŞ basılımdarınıñ habarına qarağanda, Pentagon tarabı qazirgi kezde paradtı wyımdastırudıñ dayındığı turalı aqıldasuda. Degenmen, Aq üy işinde bwl mäsele tek talqı deñgeyinde ğana qalıp otır. AQŞ Demokrattar partiyası parad ötkizudiñ artıq äri qımbat şığındı alıp keletinin alğa tartıp, äskeri şerudiñ ötkiziluine narazılıq ta bildirdi. Demokrattardı alañdatqan äskeri şerudiñ şığını ğana emes, onıñ simvoldıq mäni de üreylendirip otır.

AQŞ Kongress ökilderiniñ biri Jim Makgovern öziniñ Twitter paraqşasına: «Tramp mırza özin prezident retinde emes, diktator qatarında körsetuge tırısuda. Amerikalıqtar mwnday ülken menmendikten alañdauda», – dep jazdı.

Kongress ökilderdiñ biri Jekiy Speyer CNN arnasına bergen swhbatında: «Tramptıñ bwl oyı meni qattı tañğaldırdı. Bizdiñ özimizdiñ Napoleonımız payda bolıp keledi», – dedi.

Jwrtqa mälim bolğanınday, äskeri şeru demokratiyalıq batıs elderinde tım sirek ötkiziledi. Äsirese amerikalıqtar äskeri parad dese Soltüstik Koreyanı elestetedi. AQŞ-tıñ äskeri saladağı qızmetkerleri de parad turalı mülde jağımsız äserde ekenin aytadı. General-leytenant Mark Herlinñ (Harling) CNN-ge: «Äskeri qızmetkerler eñ joğarı qolbasşınıñ barlıq tapsırmasın orındaydı. Biraq, bwl oylağanı bizdiñ armiyağa say kelmeytin ideya. Ol jäne qarulı küşterdiñ mindeti de emes, küş-quattımızben maqtanudıñ keregi de joq», – degen pikirin ayttı.

Qwrama Ştattıñ ortalıq qalası Uaşingtonda eñ soñğı äskeri parad 1991 jılı bolğan. Bwl äskeri parad Şığanaq soğısınıñ ayaqtalıp, Kuveyttiñ bosatıluına arnalğan bolatın.

“The Qazaq Times”