ترامپ اسكەري پاراد وتكىزبەك: اقش-تا جاڭا ناپولەون پايدا بولدى ما؟

اقش باسىلىمدارىنىڭ حابارلاۋىنشا، وتكەن جىلى پاريجدە وتكەن اسكەري پارادتان قۇراما شتات پرەزيدەنتى دونالد ترامپ قاتتى اسەرلەنگەن. وسىعان دەيىن ۋاشينگتوندا اسكەري پاراد قانداي دا ءبىر اسكەري جانجالداردىڭ اياقتالۋىنا وراي وتكىزىلىپ كەلەدى. الداعى ۋاقىتتا پرەزيدەنت ترامپ قارۋلى كۇشتەرگە قۇرمەت رەتىندە اسكەري پاراد وتكىزۋدى ويلاپ وتىر. بۇل تۋرالى Washington Post باسىلىمى العاش رەت جازدى. كەيىن WSJ جانە BBC-ءدىڭ رەسمي سايتى حابارلادى.

اقش باسىلىمدارىنىڭ حابارىنا قاراعاندا، پەنتاگون تارابى قازىرگى كەزدە پارادتى ۇيىمداستىرۋدىڭ دايىندىعى تۋرالى اقىلداسۋدا. دەگەنمەن، اق ءۇي ىشىندە بۇل ماسەلە تەك تالقى دەڭگەيىندە عانا قالىپ وتىر. اقش دەموكراتتار پارتياسى پاراد وتكىزۋدىڭ ارتىق ءارى قىمبات شىعىندى الىپ كەلەتىنىن العا تارتىپ، اسكەري شەرۋدىڭ وتكىزىلۋىنە نارازىلىق تا ءبىلدىردى. دەموكراتتاردى الاڭداتقان اسكەري شەرۋدىڭ شىعىنى عانا ەمەس، ونىڭ سيمۆولدىق ءمانى دە ۇرەيلەندىرىپ وتىر.

اقش كونگرەسس وكىلدەرىنىڭ ءبىرى جيم ماكگوۆەرن ءوزىنىڭ Twitter پاراقشاسىنا: «ترامپ مىرزا ءوزىن پرەزيدەنت رەتىندە ەمەس، ديكتاتور قاتارىندا كورسەتۋگە تىرىسۋدا. امەريكالىقتار مۇنداي ۇلكەن مەنمەندىكتەن الاڭداۋدا»، – دەپ جازدى.

كونگرەسس وكىلدەردىڭ ءبىرى جەكي سپەيەر CNN ارناسىنا بەرگەن سۇحباتىندا: «ترامپتىڭ بۇل ويى مەنى قاتتى تاڭعالدىردى. ءبىزدىڭ ءوزىمىزدىڭ ناپولەونىمىز پايدا بولىپ كەلەدى»، – دەدى.

جۇرتقا ءمالىم بولعانىنداي، اسكەري شەرۋ دەموكراتيالىق باتىس ەلدەرىندە تىم سيرەك وتكىزىلەدى. اسىرەسە امەريكالىقتار اسكەري پاراد دەسە سولتۇستىك كورەيانى ەلەستەتەدى. اقش-تىڭ اسكەري سالاداعى قىزمەتكەرلەرى دە پاراد تۋرالى مۇلدە جاعىمسىز اسەردە ەكەنىن ايتادى. گەنەرال-لەيتەنانت مارك حەرلينڭ (Harling) CNN-گە: «اسكەري قىزمەتكەرلەر ەڭ جوعارى قولباسشىنىڭ بارلىق تاپسىرماسىن ورىندايدى. بىراق، بۇل ويلاعانى ءبىزدىڭ ارمياعا ساي كەلمەيتىن يدەيا. ول جانە قارۋلى كۇشتەردىڭ مىندەتى دە ەمەس، كۇش-قۋاتتىمىزبەن ماقتانۋدىڭ كەرەگى دە جوق»، – دەگەن پىكىرىن ايتتى.

قۇراما شتاتتىڭ ورتالىق قالاسى ۋاشينگتوندا ەڭ سوڭعى اسكەري پاراد 1991 جىلى بولعان. بۇل اسكەري پاراد شىعاناق سوعىسىنىڭ اياقتالىپ، كۋۆەيتتىڭ بوساتىلۋىنا ارنالعان بولاتىن.

“The Qazaq Times”