Pioñçañ qalası olimpiyadağa dayındaluda. Foto: Sky News.

Oñtüstik Koreyanıñ Pioñçañ qalasında ötkeli jatqan qısqı Olimpiada oyındarınıñ bastaluına birneşe kün qalğan kezde, şañğı sportı boyınşa birneşe sportşınıñ doping qoldanğanı turalı mälimetter aşıqqa şıqqanın älemdik tanımal BAQ ökilderi habarladı.

Britaniyanıñ The Sunday Times basılımı jäne Germaniyanıñ ARD arnası 10 mıñğa juıq qan analizderiniñ tekseru qorıtındısı turalı mälimetterdi qolğa tüsirgen. Atalğan BAQ ökilderi mwnday mälimetterdiñ jariyalanuı aldağı uaqıtta doping janjalın küşeyte tüsui mümkin deydi. Al, bwl retki qısqı Olimpiada oyındarına qatısatın sportşılardıñ sanı eki mıñnıñ aynalasında. Pioñçañ qısqı Olimpiada oyındarı osı aptanıñ soñında bastalğalı twr.

Atalğan BAQ qwraldarı qol jetkizgen mälimetterge qarağanda 2001 jıldan bergi şañğı sportşıları  alğan medal'dardıñ üşten birin qan analizi küdikti degen sportşılar alğan. Onıñ işinde Älem çempionatı men Olimpiada sportşılarınıñ 91 altın medali de bar. Al aldağı qısqı Olimpiada oyındarında öz eliniñ tuın köterip jarısqa qatısudan şettetilgen Resey sportşıları bwl tizimde birinşi orında twr.

The Sunday Times basılımı qolındağı mälimetterge süyene otırıp, Pioñçañ Olimpiadasına qatısuğa rwqsat alğan 50 şañğı sportşısı doping qabıldağan boluı mümkin, biraq sankciyalarğa ilinbey qalğan dep boljaydı.

Pioñçañ Olimpiadasına Resey 389 sportşı qatıstırudı ötiniş etken, biraq, Halıqaralıq olimpiada komiteti tek 169 sportşığa ğana rwqsat berdi. Tipti, reseylik älemge tanımal sportşılar Anton Şipulin men Sergey Ustyugov te oyınnan şettetildi.

“The Qazaq Times”