پيوڭچاڭ قىسقى وليمپياداسىن كۇشتى دوپينگ داۋى كۇتىپ تۇر

وڭتۇستىك كورەيانىڭ پيوڭچاڭ قالاسىندا وتكەلى جاتقان قىسقى وليمپيادا ويىندارىنىڭ باستالۋىنا بىرنەشە كۇن قالعان كەزدە، شاڭعى سپورتى بويىنشا بىرنەشە سپورتشىنىڭ دوپينگ قولدانعانى تۋرالى مالىمەتتەر اشىققا شىققانىن الەمدىك تانىمال باق وكىلدەرى حابارلادى.

بريتانيانىڭ The Sunday Times باسىلىمى جانە گەرمانيانىڭ ARD ارناسى 10 مىڭعا جۋىق قان اناليزدەرىنىڭ تەكسەرۋ قورىتىندىسى تۋرالى مالىمەتتەردى قولعا تۇسىرگەن. اتالعان باق وكىلدەرى مۇنداي مالىمەتتەردىڭ جاريالانۋى الداعى ۋاقىتتا دوپينگ جانجالىن كۇشەيتە ءتۇسۋى مۇمكىن دەيدى. ال، بۇل رەتكى قىسقى وليمپيادا ويىندارىنا قاتىساتىن سپورتشىلاردىڭ سانى ەكى مىڭنىڭ اينالاسىندا. پيوڭچاڭ قىسقى وليمپيادا ويىندارى وسى اپتانىڭ سوڭىندا باستالعالى تۇر.

اتالعان باق قۇرالدارى قول جەتكىزگەن مالىمەتتەرگە قاراعاندا 2001 جىلدان بەرگى شاڭعى سپورتشىلارى  العان مەدالداردىڭ ۇشتەن ءبىرىن قان ءاناليزى كۇدىكتى دەگەن سپورتشىلار العان. ونىڭ ىشىندە الەم چەمپيوناتى مەن وليمپيادا سپورتشىلارىنىڭ 91 التىن مەدالى دە بار. ال الداعى قىسقى وليمپيادا ويىندارىندا ءوز ەلىنىڭ تۋىن كوتەرىپ جارىسقا قاتىسۋدان شەتتەتىلگەن رەسەي سپورتشىلارى بۇل تىزىمدە ءبىرىنشى ورىندا تۇر.

The Sunday Times باسىلىمى قولىنداعى مالىمەتتەرگە سۇيەنە وتىرىپ، پيوڭچاڭ وليمپياداسىنا قاتىسۋعا رۇقسات العان 50 شاڭعى سپورتشىسى دوپينگ قابىلداعان بولۋى مۇمكىن، بىراق سانكتسيالارعا ىلىنبەي قالعان دەپ بولجايدى.

پيوڭچاڭ وليمپياداسىنا رەسەي 389 سپورتشى قاتىستىرۋدى ءوتىنىش ەتكەن، بىراق، حالىقارالىق وليمپيادا كوميتەتى تەك 169 سپورتشىعا عانا رۇقسات بەردى. ءتىپتى، رەسەيلىك الەمگە تانىمال سپورتشىلار انتون شيپۋلين مەن سەرگەي ۋستيۋگوۆ تە ويىننان شەتتەتىلدى.

“The Qazaq Times”