Foto: azattyq.org

Katar Parsı şığanağı elderiniñ ıntımaqtastığı keñesiniñ AQŞ-pen birlesken sammitine qatısuğa dayın ekenin jetkizdi.  Bwl turalı arnayı mälimdeme jasağan Katardıñ Sırtqı İster ministri Parsı şığanağı elderiniñ kelissözderge aşıqtığına ümit arttı. AQŞ-tıñ käsipkerlik institutındağı söylegen sözinde şeyh Mwhammed bin Abdulrahman äl-Tani de Arab memleketterimen Katar arasındağı mäseleni talqılau teñdik qağidasına süyenip jürgizilui kerektigine toqtaldı. 

Parsı şığanağı elderiniñ ıntımaqtastıq keñesi - Arab jartıtübeginiñ altı memleketiniñ basın qosatın ekonomikalıq jäne sayasi odaq. Keñestiñ qatarına Bahreyn, Kuveyt, Oman, Katar, Saud Arabiyası men Birikken Arab Ämirlikteri kiredi. AQŞ pen Parsı şığanağı elderiniñ ıntımaqtastıq keñesiniñ soñğı otırısı 2017 jıldıñ mamır ayında ötti. Ötken jıldıñ mausım ayında Saud Arabiyası, Birikken Arab Ämirlikteri, Bahreyn, Egipet Katardı "terrorizmdi qoldadı"dep ayıptap, onımen diplomatiyalıq qarım-qatınastarın üzgen bolatın.

BWW-nıñ Adam qwqıqtarı jönindegi komissiyası juırda jariyalağan bayandamasında Arab memleketteriniñ Katarğa taqqan ayıptarın "negizsiz" dep taptı. Komissiya qızmetkerleri 2017 jıldıñ qaraşasında Katarğa arnayı kelip, 20 ükimettik, 40 ükimettik emes wyımdardıñ ökilderimen kezdesip, swhbat jürgizgen. Diplomatiyalıq dağdarıstan bwrın, Katar halqı özge Arab memleketterine erkin sayahattap, "memleketaralıq nekeler" köp qwrılğan. Qazir Katarğa ornatılğan blokada bärinen de tuıstarı şetelde qalğan azamattarğa äserin tigizip otır.

 “The Qazaq Times”