VVS aqparattıq agenttigi jürgizgen zertteudiñ nätijesi Auğanstan jeriniñ 70 payızına "Taliban" äskeri tobı üstemdik jürgizip otırğanın körsetti. Auğanstan Ükimeti memleket territoriyasınıñ köp böligin öz baqılauında wstap otırğanın aytıp, qabıldaudan bas tartqan zertteu qorıtındıları atalğan aumaqta "Islam memleketi" terroristik wyımınıñ da ıqpalı bar ekenin, al Talibandıqtar 2014 jılı şeteldik äskeri koaliciya ketkennen keyin, küş ala bastağanın ayğaqtaydı. Ötken jılı öz äskeriniñ Auğanstanda qala beretinin mälimdegen AQŞ prezidenti Donal'd Tramp "Taliban" terroristik wyımımen qanday da bir kelissözderge keluden bas tartıp otır. 

VVS aqparattıq agenttigi wsınğan derekterge säykes, Taliban Auğanstannıñ tek 14 audanın (memleket territoriyasınıñ 4%) tolıqtay öz ieleginde wstağanımen, qosımşa 263 aymaqta (66%) belsendilik tanıtıp otır. Jalpı halıq sanınıñ jartısına juığı - 15 mln beybit twrğın talibandıqtardıñ qol astındağı ne olar jii şabuıldaytın öñirlerde twradı. Jergilikti twrğındardıñ biri VVS tilşisine: "Men üyden şığar kezde, qayta oralmauım mümkin ekenin ünemi oyğa alamın. Taliban, terrakt pen jarılıstar bizdiñ kündelikti ömirimizdiñ bir böligine aynalıp ketti ", - degen.

VVS wsınğan bayandamadan Taliban wyımınıñ negizgi bekingen aumağı oñtüstikten eldiñ şığıs, soltüstik jäne batıs aumaqtarına qaray oyısqanın köruge boladı. Taliban äskeri tobı 2001 jılı bilikten ayırılğannan keyin şeteldik äskeri koaliciya Ükimettiñ qolına qaytaru üşin soğısqan Gilmend öñirin 2014 jıldan keyin öz biligine qayta alğan. 2001-2014 jıldar aralığında osı aumaqta 450 britandıq äskeri köz jwmğan.

Taliban wyımı Auğanstan äskerine qarsı şabuıldarın ärtürli jiilikpen wyımdastıradı. Qwrbandar sanı da säykesinşe özgerip otıratın jarılıstar keyde aptasına eki ret, al keyde üş ayda bir ret boladı. VVS tilşileri 122 audannıñ (memleket territoriyasınıñ 30%) Auğanstan Ükimetiniñ qol astında ekenin anıqtadı. Degenmen bwl derek atalğan audandardı mekendeytin halıqtıñ ömirine eş qauip tönbeytinin bildirmeydi.

BWW keltirgen derekke säykes, 2017 jıldıñ alğaşqı toğız ayında 8 mıñ 500 beybit twrğın qaza tapqan. 2018 jıldıñ qañtar ayınıñ alğaşqı jartısında Kabulda 3 jarılıs bolıp, 130 adam mert bolğan.

“The Qazaq Times”