Foto: AFP. Päkistandağı AQŞ-tıñ äreketin sınağan şeruden körinis.

AQŞ-tıñ Päkistanğa bağıttalğan qauipsizdik salasındağı qarjılay kömegi Islamabadtıñ Auğanstan talibteri men Hakki terroristik jelisine qarsı küresinde eleuli nätijeler körsete almağanı üşin toqtatıldı. Sarapşılar Päkistan jalpı kölemi 900 mln AQŞ dollarınan artıq qarjıdan qağılğanın aytadı. Onıñ 255 mln $ AQŞ-tıñ şeteldik äskeri qarjılandıru qorı arqılı Päkistanğa qorğanıs tehnikası men äskeri jattığulardı jürgizuge berilse, qalğan 700 mln $ terroristik toptarğa qarsı küreske berilip kelgen. 

Sarapşılar Päkistan äskeri AQŞ-tıñ kömeginsiz biraz uaqıt twralau qalpında bolatının aytadı. Olardıñ pikirinşe, onıñ ornına qarjılandırudıñ jaña közi bolatın Qıtay siyaqtı memleketter Päkistan äskeriniñ barlıq qajettilikterin ötey almaydı. Sondıqtan da bolar, Päkistan AQŞ-tıñ äskeri kömek beruden bas tartu turalı şeşimin wnata qoymadı. Päkistannıñ Sırtqı İster ministri Hvadja Asif AQŞ-tı "qanıpezer dos" dep atadı. Onıñ oyınşa, AQŞ-tı dos ne dwşpan dep naqtı atau mümkin emes.

Päkistannıñ Sırtqı İster ministrligi soñğı 15 jıl boyı öñirdegi tınıştıqtı saqtau üşin memleket öziniñ jeke qarjısınan 120 mlrd AQŞ dolların jwmsağanın mälimdedi. VVS aqparattıq agenttiginiñ joldağan saualına  Päkistan äskeriniñ baspasöz hatşısı "Biz üşin aqşa emes, tınıştıq mañızdı" dep jauap bergen. Päkistan AQŞ-tıñ äreketi barlığı üşin ortaq qauip terrorizmge qarsı küreske keri äser etui mümkin ekenin eskertken bolatın.

Sarapşılar Päkistan AQŞ-tıñ şeşimine jauap retinde Auğansstanğa baratın qwrlıq jolın jauıp tastay alatının aytadı. Amerika Auğanstanğa ärtürli jükter tasımaldaytındıqtan, bwl oğan birşama qiındıqtar tuğızuı mümkin. 2011, 2012 jıldarı Amerika wşaqtarınıñ Päkistan poştasın bombalauı men Usama Ben Ladenniñ öltiriluine baylanıstı atalğan qwrlıq jolı jabılğan edi. Biraq bwl jolı Päkistannıñ qarsı qimıldar jasauı qos memleket qarım-qatınasın odan äri uşıqtırıp jiberui mümkin. "Sondıqtan Päkistan qatañ şaralar qabıldauğa asıqpaydı", - deydi.

“The Qazaq Times”