فوتو: AFP. پاكىستانداعى اقش-تىڭ ارەكەتىن سىناعان شەرۋدەن كورىنىس.

اقش-تىڭ پاكىستانعا باعىتتالعان قاۋىپسىزدىك سالاسىنداعى قارجىلاي كومەگى يسلامابادتىڭ اۋعانستان تاليبتەرى مەن حاككي تەرروريستىك جەلىسىنە قارسى كۇرەسىندە ەلەۋلى ناتيجەلەر كورسەتە الماعانى ءۇشىن توقتاتىلدى. ساراپشىلار پاكىستان جالپى كولەمى 900 ملن اقش دوللارىنان ارتىق قارجىدان قاعىلعانىن ايتادى. ونىڭ 255 ملن $ اقش-تىڭ شەتەلدىك اسكەري قارجىلاندىرۋ قورى ارقىلى پاكىستانعا قورعانىس تەحنيكاسى مەن اسكەري جاتتىعۋلاردى جۇرگىزۋگە بەرىلسە، قالعان 700 ملن $ تەرروريستىك توپتارعا قارسى كۇرەسكە بەرىلىپ كەلگەن. 

ساراپشىلار پاكىستان اسكەرى اقش-تىڭ كومەگىنسىز ءبىراز ۋاقىت تۇرالاۋ قالپىندا بولاتىنىن ايتادى. ولاردىڭ پىكىرىنشە، ونىڭ ورنىنا قارجىلاندىرۋدىڭ جاڭا كوزى بولاتىن قىتاي سياقتى مەملەكەتتەر پاكىستان اسكەرىنىڭ بارلىق قاجەتتىلىكتەرىن وتەي المايدى. سوندىقتان دا بولار، پاكىستان اقش-تىڭ اسكەري كومەك بەرۋدەن باس تارتۋ تۋرالى شەشىمىن ۇناتا قويمادى. پاكىستاننىڭ سىرتقى ىستەر ءمينيسترى حۆادجا اسيف اقش-تى "قانىپەزەر دوس" دەپ اتادى. ونىڭ ويىنشا، اقش-تى دوس نە دۇشپان دەپ ناقتى اتاۋ مۇمكىن ەمەس.

پاكىستاننىڭ سىرتقى ىستەر مينيسترلىگى سوڭعى 15 جىل بويى وڭىردەگى تىنىشتىقتى ساقتاۋ ءۇشىن مەملەكەت ءوزىنىڭ جەكە قارجىسىنان 120 ملرد اقش دوللارىن جۇمساعانىن مالىمدەدى. ۆۆس اقپاراتتىق اگەنتتىگىنىڭ جولداعان ساۋالىنا  پاكىستان اسكەرىنىڭ ءباسپاسوز حاتشىسى ء"بىز ءۇشىن اقشا ەمەس، تىنىشتىق ماڭىزدى" دەپ جاۋاپ بەرگەن. پاكىستان اقش-تىڭ ارەكەتى بارلىعى ءۇشىن ورتاق قاۋىپ تەرروريزمگە قارسى كۇرەسكە كەرى اسەر ەتۋى مۇمكىن ەكەنىن ەسكەرتكەن بولاتىن.

ساراپشىلار پاكىستان اقش-تىڭ شەشىمىنە جاۋاپ رەتىندە اۋعانسستانعا باراتىن قۇرلىق جولىن جاۋىپ تاستاي الاتىنىن ايتادى. امەريكا اۋعانستانعا ءارتۇرلى جۇكتەر تاسىمالدايتىندىقتان، بۇل وعان ءبىرشاما قيىندىقتار تۋعىزۋى مۇمكىن. 2011, 2012 جىلدارى امەريكا ۇشاقتارىنىڭ پاكىستان پوشتاسىن بومبالاۋى مەن ۋساما بەن لادەننىڭ ولتىرىلۋىنە بايلانىستى اتالعان قۇرلىق جولى جابىلعان ەدى. بىراق بۇل جولى پاكىستاننىڭ قارسى قيمىلدار جاساۋى قوس مەملەكەت قارىم-قاتىناسىن ودان ءارى ۋشىقتىرىپ جىبەرۋى مۇمكىن. "سوندىقتان پاكىستان قاتاڭ شارالار قابىلداۋعا اسىقپايدى", - دەيدى.

“The Qazaq Times”