AQŞ Irannıñ 5 kompaniyasına qarsı sankciya engizdi

AQŞ Irannıñ 5 kompaniyasına qarsı sankciya engizdi. Atalğan kompaniyalarğa "Irannıñ yadrolıq bağdarlamasına qatısqan" degen ayıp tağılıp otır. Ekonomikalıq şekteu şarasına kompaniyalardıñ AQŞ-tağı aktivterine qoljetimdilikti toqtatu jäne amerikalıqtarğa atalğan käsiporındarmen baylanısuğa tıyım salu kiredi. Sonımen qatar AQŞ BWW-nıñ Qauipsizdik Keñesiniñ küntärtibine Irandağı halıqtıq narazılıq şerulerin qoyudı talap etti. Bwl turalı AFP aqparattıq agenttigi jazdı. 

AQŞ-tıñ ötinişi boyınşa BWW-nıñ Qauipsizdik keñesiniñ otırısında talqılanatın Irandağı köterilis mäselesin özge memleketter kün tärtibinen alıp tastay aladı. Äzirge Reseyden basqa, Irannıñ ayqı qoldauşıları körinbeydi. Reseydiñ Sırtqı İster ministriniñ orınbasarı Sergey Ryabkov: "Bolıp jatqan oqiğalar turalı aqparattar qalay özgertilip berilse de, biz Irandağı jağday retteletinine senemiz", - dedi.

AQŞ Prezidenti Donal'd Tramp ötken aptada bastalıp, 21 adamnıñ ölimine sebep bolğan köterilisti qoldaytının öziniñ tvitterdegi jazbaları arqılı bildirip edi. Soñğı engizilgen sankciyalar men Iran mäselesin BWW deñgeyinde bükil älemniñ nazarına şığaruğa degen talpınısınan keyin, Irannıñ Sırtqı İster ministri Mwhammed Javad Zariftıñ: "Donal'd Tramp öziniñ iran halqın qalay qwrmetteytinin körsetti", - dep äjualağan jazbasına AQŞ-tıñ Qorğanıs ministri Djim Mattis: "Amerika halqınıñ iran halqımen eş mäselesi joq. Bizdiñ şeşilmegen mäselelerimiz Irannıñ avtoritarlıq rejimimen baylanıstı", - dep jauap berdi.

“The Qazaq Times”