فوتو: politicus.ru

اقش يراننىڭ 5 كومپانياسىنا قارسى سانكتسيا ەنگىزدى. اتالعان كومپانيالارعا "يراننىڭ يادرولىق باعدارلاماسىنا قاتىسقان" دەگەن ايىپ تاعىلىپ وتىر. ەكونوميكالىق شەكتەۋ شاراسىنا كومپانيالاردىڭ اقش-تاعى اكتيۆتەرىنە قولجەتىمدىلىكتى توقتاتۋ جانە امەريكالىقتارعا اتالعان كاسىپورىندارمەن بايلانىسۋعا تىيىم سالۋ كىرەدى. سونىمەن قاتار اقش بۇۇ-نىڭ قاۋىپسىزدىك كەڭەسىنىڭ كۇنتارتىبىنە يرانداعى حالىقتىق نارازىلىق شەرۋلەرىن قويۋدى تالاپ ەتتى. بۇل تۋرالى AFP اقپاراتتىق اگەنتتىگى جازدى. 

اقش-تىڭ ءوتىنىشى بويىنشا بۇۇ-نىڭ قاۋىپسىزدىك كەڭەسىنىڭ وتىرىسىندا تالقىلاناتىن يرانداعى كوتەرىلىس ماسەلەسىن وزگە مەملەكەتتەر كۇن تارتىبىنەن الىپ تاستاي الادى. ازىرگە رەسەيدەن باسقا، يراننىڭ ايقى قولداۋشىلارى كورىنبەيدى. رەسەيدىڭ سىرتقى ىستەر ءمينيسترىنىڭ ورىنباسارى سەرگەي ريابكوۆ: "بولىپ جاتقان وقيعالار تۋرالى اقپاراتتار قالاي وزگەرتىلىپ بەرىلسە دە، ءبىز يرانداعى جاعداي رەتتەلەتىنىنە سەنەمىز", - دەدى.

اقش پرەزيدەنتى دونالد ترامپ وتكەن اپتادا باستالىپ، 21 ادامنىڭ ولىمىنە سەبەپ بولعان كوتەرىلىستى قولدايتىنىن ءوزىنىڭ تۆيتتەردەگى جازبالارى ارقىلى ءبىلدىرىپ ەدى. سوڭعى ەنگىزىلگەن سانكتسيالار مەن يران ماسەلەسىن بۇۇ دەڭگەيىندە بۇكىل الەمنىڭ نازارىنا شىعارۋعا دەگەن تالپىنىسىنان كەيىن، يراننىڭ سىرتقى ىستەر ءمينيسترى مۇحاممەد جاۆاد زاريفتىڭ: "دونالد ترامپ ءوزىنىڭ يران حالقىن قالاي قۇرمەتتەيتىنىن كورسەتتى", - دەپ اجۋالاعان جازباسىنا اقش-تىڭ قورعانىس ءمينيسترى دجيم ماتتيس: "امەريكا حالقىنىڭ يران حالقىمەن ەش ماسەلەسى جوق. ءبىزدىڭ شەشىلمەگەن ماسەلەلەرىمىز يراننىڭ اۆتوريتارلىق رەجيمىمەن بايلانىستى", - دەپ جاۋاپ بەردى.

“The Qazaq Times”