Foto: Business Insider

Iran Revolyuciyalıq gvardiyasınıñ basşısı Mwhammed Äli Djafari eldegi Ükimetke qarsı narazılıq şeruleri jeñilgenin habarladı. Ol mwnday mälimdemeni on mıñğa juıq azamat memlekettik bilikti qoldap, bülikşilerge qarsı akciyağa qatısqannan keyin jasadı. Bağalardıñ köteriluin sınap, soñı Ükimetke qarsı halıqtıq qarsılıqqa wlasqan şeru ötken aptada bastalıp, nätijesinde 21 adam qaza taptı. Bwl turalı VVS aqparattıq agenttigi jazdı. 

General Mwhammed Äli Djafari: "96-jıldıñ oqiğası osımenen ayaqtaldı", - dedi parsı küntizbesi boyınşa 1396 jıl ekenin eskertip. Qauipsizdikti qorğauğa degen wmtılıs jaulardıñ alaböten oyın jüzege asıruğa jol bermegenin aytqan ol qauipsizdik qızmetkerleriniñ aralasu qajettiligi öte tömen bolğanın aytadı. Iran Revolyuciyalıq gvardiyasınıñ basşısı:  "Narazılıq şeruine är aumaqta 1,5 mıñ şamasında ğana adamnan, bükil el boyınşa jalpı sanı 15 mıñğa juıq twrğın qatıstı", - dep habarladı.

Generaldıñ pikirinşe, el işindegi qoğamdıq tärtipti bwzuğa şeteldik tıñşılar men Iran memleketiniñ jauları atsalısqan. Ol osı sözi arqılı eldegi bülikke AQŞ, Izrail', Saud Arabiyasın ayıptağan Ayatolla Äli Hameneydiñ oyın qostadı. Kinälilerdiñ qatarına sonday-aq, soñğı kezderi Ükimet qızmetin sınap jürgen Irannıñ bwrınğı Prezidenti Mahmwd Ahmadinejad ta ilikti. Memlekettik telearnalar Kermanşah, Ilam, Gorgan qalalarında ötken Ükimetti qoldaytın demonstraciyalardıñ beynejazbasın tarattı.

Reuters aqparattıq agenttigi Irannıñ Malayer qalasında köterilis jaña küşpen keşe keşkisin qayta jalğasqanın aytadı. Onda adamdar: "Bileuşi özin Qwday siyaqtı wstaydı" dep wrandatqan. Nouşharda ötken osınday qarsılıqtardıñ birinde halıqtıñ Ayatolla Äli Hameneyge qarsı "Diktatorğa ölim" dep ayqaylağan beynejazbası äleumettik jeliden tabıldı.

AQŞ Prezidenti Donal'd Tramp öziniñ tvitterdegi jazbaları arqılı Irandağı köterilisşilerdi qoldaytının körsetti. AQŞ-tıñ BWW-dağı elşisi Nikki Heyli: "Iran halqı bostandıq swrauda", - dep mälimdedi. Qañtar ayınıñ ortasında Donal'd Tramp 2015 jılı küşin joyğan ekonomikalıq şekteu şaralarınan keyin, Iranğa qarsı  jaña sankciyalar engizetinin ne kelisimdi saqtap qalatının jariyalaydı.

“The Qazaq Times”