يرانداعى ۇكىمەتكە قارسى نارازىلىق شەرۋلەرى اياقتالدى ما؟

يران رەۆوليۋتسيالىق گۆاردياسىنىڭ باسشىسى مۇحاممەد ءالي دجافاري ەلدەگى ۇكىمەتكە قارسى نارازىلىق شەرۋلەرى جەڭىلگەنىن حابارلادى. ول مۇنداي مالىمدەمەنى ون مىڭعا جۋىق ازامات مەملەكەتتىك بيلىكتى قولداپ، بۇلىكشىلەرگە قارسى اكتسياعا قاتىسقاننان كەيىن جاسادى. باعالاردىڭ كوتەرىلۋىن سىناپ، سوڭى ۇكىمەتكە قارسى حالىقتىق قارسىلىققا ۇلاسقان شەرۋ وتكەن اپتادا باستالىپ، ناتيجەسىندە 21 ادام قازا تاپتى. بۇل تۋرالى ۆۆس اقپاراتتىق اگەنتتىگى جازدى. 

گەنەرال مۇحاممەد ءالي دجافاري: "96-جىلدىڭ وقيعاسى وسىمەنەن اياقتالدى", - دەدى پارسى كۇنتىزبەسى بويىنشا 1396 جىل ەكەنىن ەسكەرتىپ. قاۋىپسىزدىكتى قورعاۋعا دەگەن ۇمتىلىس جاۋلاردىڭ الابوتەن ويىن جۇزەگە اسىرۋعا جول بەرمەگەنىن ايتقان ول قاۋىپسىزدىك قىزمەتكەرلەرىنىڭ ارالاسۋ قاجەتتىلىگى وتە تومەن بولعانىن ايتادى. يران رەۆوليۋتسيالىق گۆاردياسىنىڭ باسشىسى:  "نارازىلىق شەرۋىنە ءار اۋماقتا 1,5 مىڭ شاماسىندا عانا ادامنان، بۇكىل ەل بويىنشا جالپى سانى 15 مىڭعا جۋىق تۇرعىن قاتىستى", - دەپ حابارلادى.

گەنەرالدىڭ پىكىرىنشە، ەل ىشىندەگى قوعامدىق ءتارتىپتى بۇزۋعا شەتەلدىك تىڭشىلار مەن يران مەملەكەتىنىڭ جاۋلارى اتسالىسقان. ول وسى ءسوزى ارقىلى ەلدەگى بۇلىككە اقش، يزرايل، ساۋد ارابياسىن ايىپتاعان اياتوللا ءالي حامەنەيدىڭ ويىن قوستادى. كىنالىلەردىڭ قاتارىنا سونداي-اق، سوڭعى كەزدەرى ۇكىمەت قىزمەتىن سىناپ جۇرگەن يراننىڭ بۇرىنعى پرەزيدەنتى ماحمۇد احمادينەجاد تا ىلىكتى. مەملەكەتتىك تەلەارنالار كەرمانشاح، يلام، گورگان قالالارىندا وتكەن ۇكىمەتتى قولدايتىن دەمونستراتسيالاردىڭ بەينەجازباسىن تاراتتى.

Reuters اقپاراتتىق اگەنتتىگى يراننىڭ مالايەر قالاسىندا كوتەرىلىس جاڭا كۇشپەن كەشە كەشكىسىن قايتا جالعاسقانىن ايتادى. وندا ادامدار: "بيلەۋشى ءوزىن قۇداي سياقتى ۇستايدى" دەپ ۇرانداتقان. نوۋشحاردا وتكەن وسىنداي قارسىلىقتاردىڭ بىرىندە حالىقتىڭ اياتوللا ءالي حامەنەيگە قارسى "ديكتاتورعا ءولىم" دەپ ايقايلاعان بەينەجازباسى الەۋمەتتىك جەلىدەن تابىلدى.

اقش پرەزيدەنتى دونالد ترامپ ءوزىنىڭ تۆيتتەردەگى جازبالارى ارقىلى يرانداعى كوتەرىلىسشىلەردى قولدايتىنىن كورسەتتى. اقش-تىڭ بۇۇ-داعى ەلشىسى نيككي حەيلي: "يران حالقى بوستاندىق سۇراۋدا", - دەپ مالىمدەدى. قاڭتار ايىنىڭ ورتاسىندا دونالد ترامپ 2015 جىلى كۇشىن جويعان ەكونوميكالىق شەكتەۋ شارالارىنان كەيىن، يرانعا قارسى  جاڭا سانكتسيالار ەنگىزەتىنىن نە كەلىسىمدى ساقتاپ قالاتىنىن جاريالايدى.

“The Qazaq Times”